Ahabanza  >>  Amakuru Yose >> Hirya no Hino >> Mu Rwanda >> 

Musanze: Abantu 4 bafunzwe bazira gukora inyandiko mpimbano n’ ubwambuzi bushukana

Mu Karere ka Musanze hatahwe muri yombi abagabo babiri n’ abagore babiri bakekwaho gukora irangamuntu n’ ibindi byangombwa bitangwa na Leta ku buryo butemewe n’ amategeko. Abo ni Twagiramungu Aloys, Niyonzima Alphonse, Mukeshimana Marie Louise na Umurungi Sanyu.

Intandaro y’ ifatwa ry’ aba bantu, ni uyu Niyonzima Alphonse utuye mu karere ka Nyarugenge, umurenge wa Muhima umenyerewe nk’ umuntu ushakira abandi ahari amazu agurishwa cyangwa akodeshwa. Uyu Niyonzima Alphonse yaje gushakwa n’ umugabo witwa Kahinda Noel ngo amurangire inzu yo kugura amujyana ku Kimihurura amwereka inzu ifite agaciro ka miliyoni 15, ariko amubuza kwinjiramo ngo kuko icumbitsemo abazungu, ahubwo amuha nomero ya telefone y’ uwo yitaga nyir’ inzu ngo witwa Rudasingwa Jean.

JPEG - 27.9 kb


Aba nibo bakekwaho gukora ibyangombwa by’ ibihimbano

Nyuma baravuganye amubwira ko inzu yayishimye, banumvikana ko bazahura akamwishyura, nyamara umunsi bavuganye ugeze Kahinda yatelefonnye Rudasingwa amubwira ko arwaye, ahubwo ari no mu bitaro.

Baje guhurira mu karere ka Musanze, bemeranywa kugura, umugore nawe kuko yari azi ko mbere yo kugura agomba kuzatanga nomero y’ irangamuntu, yashatse umugabo umukorera indangamuntu yanditseho Uwamahoro Clementine, nibwo yagiye gushaka uyu Twagiramungu Aloys arabimukorera, ariko mu gihe yari agikoresha ibyo byangombwa byibihimbano, yakomeje gutinza nkana umunsi wo kugurisha inzu.

Kera kabaye Kahinda Noel yagize amakenga ko bariya bantu ari abatekamutwe, maze yiyambaza Polisi y’ u Rwanda ikorera mu karere ka Musanze, bamugira inama ko najya kubishyura yazabahamagara bakareba niba ibyo akeka ari ukuri.

Bamaze kubona ibyangombwa byose bari bakeneye ngo batekere umutwe Kahinda, baramuhamagaye ngo bahurire muri resitora Bar CINFOP mu mujyi wa Musanze, nawe ahamagara Polisi ibata muri yombi uko ari bane, ibasangana indangamuntu, ibyemezo by’ ubutaka, icyangombwa cyemeza ko Rudasingwa Jean yapfuye n’ uruhushya rwo gutwara imodoka byose by’ ibihimbano.

Ku marangamuntu babafatanye, harimo iya Uwamahoro Clementine ariwe Mukeshimana Marie Louise, n’ iya Umugwaneza Sandra ariwe Umurungi Sanyu bavugaga ko ari imfura ya Rudasingwa na Uwamahoro.

Aba bose bemera icyaha cyo gukora impapuro mpimbano, ariko bakitana ba mwana kuzikora.

Umuvugizi wa Polisi mu ntara y’ Amajyaruguru Chief Superitendent (CSP) Francis Gahima, yatangaje ko aba bantu bakurikiranyweho ibyaha bibiri birimo gukora inyandiko mpimbano n’ ubwambuzi bushukana.

CSP Gahima yakomeje avuga ko ubu bujura butari busanzwe mu Ntara y’ Amajyaruguru, maze asaba abantu kugira ubushishozi kubyo bagura, cyane cyane abagura ubutaka n’ amazu.


Umufasha Joseph - imiasire.com

Kanda hano udukurikire kuri Facebook na Twitter

Tanga igitekerezo

Amazina yawe

Email yawe

Igitekerezo cyawe

Close X