Iki cyemezo cyafashwe nyuma y’uko amazi yakomeje kugabanuka muri icyo gishanga, bigatuma umusaruro w’umuceri utaba ugishimishije nk’uko byari bisanzwe.
Ubusanzwe, hagati mu gishanga hahingwaga umuceri kubera amazi menshi yahabonekaga, mu gihe ku nkengero hahingwaga ibigori.
Ubu abahinzi bahisemo guhindura igihingwa, bahitamo Soya ishobora kwihanganira imiterere y’aho hantu.
Mu gutangiza ku mugaragaro iki gikorwa mu gihembwe cy’ihinga cya B 2026, Umuyobozi w’Akarere ka Muhanga, Kayitare Jacqueline, yavuze ko guhinga Soya kuri ubu buso bunini bigamije kongera ibinyamisogwe no gufasha mu kuzamura ibigega by’ibiribwa (FOBASI).
Yagize ati: “Imbuto yatewe ni iyakorewe ubushakashatsi kandi yamaze kugeragezwa hano. Turatanga nkunganire ku mbuto no ku ifumbire mvaruganda, kandi turasaba abahinzi kudatera batifashishije inyongeramusaruro.”
Yanashimangiye ko Akarere kazafasha abahinzi kubona ibikoresho byo kuhira, birimo imashini, ku bifuza kuhira ku misozi, mu rwego rwo gukumira igihombo cyaterwa n’imihindagurikire y’ikirere.
Umukozi ushinzwe ubuhinzi muri Koperative COKAR, Nzabahimana Naftal, yavuze ko igerageza bakoze ku mbuto ya RWASO 20-3 ryagaragaje ko ishobora gutanga umusaruro urenga toni eshatu kuri hegitari.
Ati: “Ku buso bwa Are imwe twakuyeho ibiro 30, bivuze ko kuri hegitari imwe hashobora kuboneka toni zirenga eshatu. Ku buso busaga hegitari 40, turiteze umusaruro uzazamura ibinyamisogwe ku rwego rw’Akarere.”
Abahinzi bavuga ko iki cyemezo cyo kuva ku muceri bakerekeza kuri Soya ari intambwe iganisha ku buhinzi bugezweho kandi bushingiye ku bushakashatsi.
Nyirasafari Hilarie yagize ati: “Ni indi ntambwe iteza imbere ubuhinzi bwacu. Tuzakoresha imbaraga zacu dufumbiza imborera, Leta ikadufasha kubona imvaruganda, kugira ngo tuzabone umusaruro mwiza.”
Ubuyobozi bw’Akarere ka Muhanga buvuga ko iyi gahunda ishingiye ku musaruro mwiza wabonetse mu gihembwe gishize, aho ibigori byageze kuri toni zisaga 6.5 kuri hegitari, uvuye kuri toni 5.5 mu mwaka wabanje.
Guhindura igihingwa ku buso bunini butya byitezweho kongera ibinyamisogwe, guteza imbere imirire myiza no kongera ubushobozi bw’Akarere mu kwihaza mu biribwa no kubika umusaruro mu bigega byabugenewe.
