Uyu mukino watangiye ku isaha ya saa kenda z’amanywa, usifurwa na Aline Umutoni wari hagati mu kibuga, wungirijwe na Mukirisito Ange Robert na Ntwari Salum, mu gihe Ugirashebuja Ibrahim yari umusifuzi wa kane.
Marine FC yakiniraga imbere y’abafana bayo yatangiye umukino isatira cyane, maze ku munota wa gatanu ibona igitego cya mbere cyatsinzwe na Menayame Ndombe nyuma yo guhererekanya neza na Mbonyumwami Taiba.
Nyuma y’icyo gitego, iyi kipe yakomeje gukina neza igaragaza imbaraga imbere ya APR FC yashakaga kwishyura.
Ku munota wa 39, Mbonyumwami Taiba yatsindiye Marine FC igitego cya kabiri cyatumye abafana bayo barushaho kwizera intsinzi.
Ni igitego cyaturutse ku ikosa ryakozwe na Ronald Ssekiganda wambuwe umupira, mu gihe umunyezamu wa APR FC Hakizimana Adolphe na we yari yasohotse nabi.
Igice cya mbere cyarangiye Marine FC iyoboye umukino n’ibitego 2-0, igaragaza guhangana gukomeye n’ikipe ya APR FC isanzwe iri mu zikomeye muri shampiyona.
Amakipe agarutse mu gice cya kabiri, APR FC yakoze impinduka zatangiye gutanga umusaruro, ndetse ku munota wa 46, rutahizamu Djibril Ouattara ayitsindira igitego cya mbere nyuma yo guhabwa umupira mwiza na William Togui.
APR FC yakomeje gusatira ishaka kwishyura, maze ku munota wa 56 ihabwa penaliti nyuma y’uko Rutayisire Amani wa Marine akoze umupira n’intoki mu rubuga rw’amahina, Djibril Ouattara ayitera neza ku munota wa 58 atsinda igitego cya kabiri cya APR FC, bituma amakipe yombi anganya ibitego 2-2.
Mu minota yakurikiyeho amakipe yombi yakomeje gushaka igitego cy’intsinzi ariko abakinnyi ba Marine FC bakomeza kwihagararaho imbere ya APR FC yakomezaga gusatira.
Ku munota wa 85, APR FC yabonye uburyo bukomeye ubwo William Togui na Djibril Ouattara bateye amashoti akurikirana mu izamu ariko umunyezamu Irambona Vally ayakuramo.
Marine FC na yo yagerageje gusatira mu minota ya nyuma, aho ku munota wa 90+4 Ndikumana Fabio yirukankanye umupira awuhaye Ndombe awutera hejuru y’izamu.
Nyuma y’iminota itandatu y’inyongera, umukino warangiye amakipe yombi anganyije ibitego 2-2.
Kuri uyu mukino kandi, abakinnyi ba Rayon Sports bari bageze kuri Stade Umuganda baje kureba uyu mukino mbere y’uko bahura na Etincelles FC ku Cyumweru.
Kunganya kw’aya makipe byatumye Marine FC ibona inota rimwe ry’ingenzi imbere y’abafana bayo, mu gihe APR FC itabashije kubona amanota atatu, nubwo iri ku mwanya wa mbere ku rutonde rw’agateganyo rwa shampiyona, aho igize amanota 43.
Abakinnyi 11 Umutoza wa APR FC, Abderrahim Talib, yari yahisemo kubanza mu kibuga: Hakizimana Adolphe, Niyigena Clement, Nshimiyimana Yunusu, Niyomugabo Claude (C), Byiringiro Gilbert, Ruboneka Jean Bosco, Ssekiganda Ronald, Memel Dao, Djibril Outtara, Denis Omedi na William Togui
Abakinnyi 11 Umutoza wa Marine FC, Rwasamanzi Yves, nawe yari yahisemo kubanza mu kibuga: Irambona Vally, Rugirayabo Hassan, Rutayisire Amani, Mukire Confiance, Bishira Latif, Hoziana Kennedy, Ishimwe Kevin, Sibomana Sultani Bobo, Mbonyumwami Taiba, Menayame Ndombe na Usabimana Olivier (C)
