Imirasire.rw

CECAFA Kagame Cup 2026: APR FC yinyaye mu isunzu itsinda Garde Républicaine ibitego 3-1

Mahame — 2026-07-27T20:06:17Z

Nyuma yo kunyagirwa na Gor Mahia FC ibitego 5-0 ku munsi wa mbere, APR FC yari yinjiye muri uyu mukino ifite intego yo gutsinda ibitego byinshi kugira ngo biyongerere amahirwe yo kurenga amatsinda.

Umutoza Taleb Abderrahim yari yakoze impinduka ebyiri mu bakinnyi babanje mu kibuga, akuramo Ernan Siluane na Dauda Yussif Seidu, kugira ngo azamure urwego rw'imikinire muri iyi kipe y'ingabo.

APR FC yatangiye umukino isatira cyane, ndetse ku munota wa gatatu Mamadou Traore ahusha uburyo bwabazwe bwakuwemo na Kofi Mensah, mu gihe Djibril Ouattara yakomeje ateza ibibazo ubwugarizi bwa Garde Républicaine.

Gusatira kw'iyi kipe kwaaje gutanga umusaruro ku munota wa 33, ubwo kapiteni Djibril Ouattara yafunguraga amazamu.

Nyuma y'iminota irindwi gusa, yongeye gutsinda igitego cya kabiri ku mupira mwiza yari ahawe na William Mel Togui, mbere y'uko Mamadou Traore atsinda icya gatatu ku munota wa 45, bituma amakipe yombi ajya kuruhuka APR FC iyoboye umukino n'ibitego 3-0.

Mu gice cya kabiri, APR FC yakomeje gusatira ishaka kongera umubare w'ibitego kugira ngo igabanye umwenda yari ifite nyuma yo gutsindwa na Gor Mahia.

Djibril Ouattara yahushije uburyo bwinshi, harimo ishoti rikomeye ryakubise umutambiko w'izamu ndetse n'andi mahirwe atandukanye atabyajwe umusaruro.

Umutoza Taleb Abderrahim na we yakoze impinduka nyinshi yongeramo Hakim Kiwanuka, Rubuguza Jean Pierre, Fidali Uwiyaremye, Pacifique Ngabonziza, Fitina Ombolenga na Hadji Iraguha mu rwego rwo kongera imbaraga mu busatirizi.

Mu gihe abafana ba APR FC bari bizeye ko iyi kipe ishobora kongera ibitego, Garde Républicaine yabonye igitego cyo kwishyura ku munota wa 86 gitsinzwe na Maarouf Abass Abaneh, wateye ishoti ryiza rirusha umunyezamu Hakizimana Adolphe imbaraga ryinjira mu izamu.

Icyo gitego cyagabanyije ikinyuranyo, ariko nticyahinduye icyerekezo cy'umukino kuko warangiye APR FC itsinze ibitego 3-1.

Nubwo APR FC yabonye intsinzi ya mbere muri iri rushanwa, ntabwo biyoroheye kuba yagera muri ½, kuko Itsinda A irimo riyobowe na Vipers SC ifite amanota atandatu ndete ikaba izigamye ibitego bine, igakurikirwa na Gor Mahia iri ku mwanya wa kabiri n'amanota atatu izigamye ibitego bine, mu gihe APR FC ya gatatu na yo ifite amanota atatu ariko ikaba ifite umwenda w'ibitego bitatu. Garde Républicaine yo iri ku mwanya wa nyuma nta nota ifite.

Ibi bisobanuye ko APR FC isabwa gutsinda Vipers SC mu mukino wa nyuma wo mu itsinda A, nabwo ku nsinzi y'ibitego birenga 3 ikabona kuranga iki cyiciro nabwo bikaba ari uko Gor Mahia yaba yananiwe gutsinda Garde Républicaine.

CECAFA Kagame Cup 2026: Vipers FC yatsinze Gor Mahia ifata mwanya wa mbere mu itsinda A

Mahame — 2026-07-27T16:15:55Z

Uyu mukino w'umunsi wa kabiri wabereye kuri Kigali Pele Stadium, uhuza hamwe amakipe yari yatsinze imikino yayo ibanza, aho Vipers FC yari yanyagiye Garde Républicaine ibitego 3-0, mu gihe Gor Mahia FC yari yasebeje APR FC iyitsinda ibitego 5-0.

Kubera iyo ntsinzi y'amakipe yombi mu mukino ubanza, uwari butsinde uyu mukino yagombaga guhitaga afata umwanya wa mbere mu itsinda.

Umukino watangiye amakipe yombi afite ubushake bwo kubona amanota atatu, ariko Vipers FC igaragaza gukina neza no kurema uburyo bwinshi bw'ibitego, nubwo ubwugarizi bwa Gor Mahia bwakomeje kwitwara neza.

Igice cya mbere cyarangiye amakipe yombi anganya ubusa ku busa (0-0).

Mu gice cya kabiri, abatoza b'amakipe yombi bakoze impinduka bagamije kongera imbaraga mu busatirizi, ariko iminota 90 isanzwe y'umukino irangira amakipe anganya.

Mu gihe umusifuzi yari yongeyeho iminota ine, Gusto Mulongo yaje gutsindira Vipers FC igitego cy'umutwe ku munota wa gatatu w'inyongera, nyuma y'umupira mwiza wari uturutse ku ruhande.

Iki gitego ni cyo cyahesheje Vipers FC intsinzi ya kabiri yikurikiranya ndetse gihita kiyishyira ku mwanya wa mbere w'Itsinda A n'amanota atandatu.

Ku rundi ruhande, Gor Mahia FC yagumanye amanota atatu, mu gihe APR FC na Garde Républicaine zigiye guhangana mu mukino wazo wa kabiri, zikaba zari zitarabona inota na rimwe mu itsinda A.

Nyuma y'uyu mukino, Vipers FC izasozanya imikino yo mu matsinda na APR FC, mu gihe Gor Mahia FC izacakirana na Garde Républicaine mu mukino uzagena uko amakipe azakomeza mu cyiciro gikurikiraho.

Intsinzi ya Vipers FC isobanuye ko yamaze gushyira igitutu ku yandi makipe yo muri iri tsinda, cyane cyane APR FC, isabwa gutsinda imikino yayo isigaye kugira ngo igire amahirwe yo kugera muri 1/2 cy'irangiza cy'irushanwa rya CECAFA Kagame Cup 2026, ariko ikaba issabwa kwwinjiza nibura ibitego berenze 4 mu mukino igiye guhuriramo na Garde Républicaine.

Kanyankore (Yaoundé) watoje amakipe arimo APR FC na Rayon Sports yitabye Imana

Mahame — 2026-07-26T07:59:26Z

Inkuru y'urupfu rwe yamenyekanye kri uyu wa 25 Nyakanga 2026, nk'uko byemejwe n'umuryango we.

Uyu mutoza wari ufite imyaka 72 yari amaze igihe arwaye, nubwo bivugwa yigeze koroherwa n'uburwayi agasezererwa mu bitaro akajya gukurikiranirwa iwe mu rugo, ubuzima bwe bwaje kongera kuzamba kugeza yitabye Imana.

Kanyankore Jean Gilbert yasize izina rikomeye muri ruhago y'u Rwanda aho yatoje amakipe atandukanye arimo APR FC, Rayon Sports, Kiyovu Sports, Rwanda FC na AS Kigali (Les Citadins), ndetse anatoza Ikipe y'Igihugu y'u Rwanda y'abakinnyi bakina imbere mu gihugu (Rwanda B).

Kimwe mu bihe byamuranze cyane ni mu 1999, ubwo yatozaga Rwanda B akegukana igikombe cya CECAFA cyabereye mu Rwanda, intsinzi yamushyize mu batoza b'inararibonye bafite uruhare rukomeye mu iterambere rya ruhago nyarwanda.

Mu gihugu cye cy'u Burundi, Kanyankore yakiniye ikipe ya Vital'O, nyuma aza no kuyibera umutoza imyaka myinshi, aho yubatse amateka akomeye muri ruhago y'icyo gihugu.

Si ibyo gusa kuko yari azwiho no gutanga ubumenyi ku batoza bato.

Yabaye umwarimu w'abatoza benshi, barimo Francis Haringingo n'abandi benshi bageze ku rwego rwo gutoza amakipe akomeye mu karere.

Urupfu rwa Kanyankore Jean Gilbert ‘Yaoundé' rusize icyuho gikomeye mu muryango wa ruhago, haba mu Rwanda, mu Burundi no mu karere ka Afurika y'Iburasirazuba n'iyo Hagati, aho azahora yibukirwa nk'umutoza wagize uruhare rukomeye mu kuzamura urwego rw'umupira w'amaguru no gutoza abatoza n'abakinnyi benshi.

Gor Mahia FC isebereje APR FC imbere ya Perezida Kagame iyinyagira imvura y'ibitego 5-0

Mahame — 2026-07-24T20:18:52Z

Ni umukino wakurikiwe na Perezida wa Repubulika y'u Rwanda, Paul Kagame, usanzwe ari umuterankunga mukuru wa CECAFA Kagame Cup kuva mu 2002, aho atanga ibihembo bihabwa amakipe atatu yitwaye neza.

Nubwo APR FC yatangiye umukino igaragaza ubushake bwo gusatira izamu rya Gor Mahia, by'umwihariko mu minota 30 ya mbere, ntiyigeze ibasha kubyaza umusaruro uburyo yagiye ibona.

Djibrill Ouattara, William Togui na Gilbert bagerageje gushaka uburyo bwo gufungura amazamu, ariko umunyezamu Bryne Omondi Odhiambo akomeza kubabera ibamba.

Nyuma y'iminota 30, umukino wahise uhindura isura.

Ku munota wa 32, Mike Evans Kibwage yafunguye amazamu atsindishije umutwe nyuma ya koruneri yatewe neza, bituma Gor Mahia iyobora umukino.

Hashize iminota ibiri gusa, Ariste Patrick Ekandjoum Essombe yarekuriye mu izamu rya APR FC ishoti rikomeye ari inyuma y'urubuga rw'amahina, umupira uruhukira mu rushundura, Gor Mahia isoza igice cya mbere iyoboye umukino n'ibitego 2-0.

APR FC yagarutse mu gice cya kabiri ishaka kugabanya ikinyuranyo cy'ibitego yari yatsinzwe mu gice cya mbere, ariko ahubwo Gor Mahia ikomeza kuyobora umukino.

Ku munota wa 63, Paul Okoth Odhiambo yatsinze igitego cya gatatu nyuma yo guhanahana umupira neza na bagenzi be.

Ku wa 79, Sariff Sabuni Sirengo yacenze myugariro Byiringiro Jean Gilbert amurambika hasi mbere yo guhereza Lesley Otieno Owino umupira woroshye awushyira mu izamu, atsinda igitego cya kane.

Mu minota ya nyuma y'umukino, ku wa 87, Ebenezer Assifuah yatsinze igitego cya gatanu, ashyira akadomo ku mukino wabaye mubi cyane ku ruhande rwa APR FC.

Nubwo Ikipe y'Ingabo z'Igihugu yatangiye umukino ifite icyizere, uko iminota yagendaga ishira ni ko icyizere cyagiye kiyoyoka.

Abakinnyi bayo baranzwe no kugira ubunebwe no kudahuza neza mu kibuga, bamwe bagongana ku myanya imwe, ndetse ubwugarizi bwagiye bukora amakosa yabyajwe umusaruro na Gor Mahia.

Mu gice cya kabiri, abakinnyi ba APR FC bagaragaye bafite umunaniro n'umuvuduko muke, ibintu byorohereje Gor Mahia gukomeza kuyisatira no kuyirusha ku buryo bugaragara.

Abafana ba APR FC bari batangiye umukino bafite icyizere, na bo bagiye bacika intege uko ibitego bya Gor Mahia byisukiranyaga rya Nyamukandagira, mu gihe bamwe mu bafana ba Rayon Sports bari muri Stade Amahoro baririmbaga indirimbo zo gushyigikira Gor Mahia.

Iyi ntsinzi y'ibitego 5-0 ihise ishyira Gor Mahia ku mwanya wa mbere by'agateganyo mu Itsinda A, mu gihe APR FC itangiye irushanwa itsindwa mu buryo bugayitse cyane ndetse iraye ku mwanya wa myuma muri iri tsinda.

Undi mukino wari wabanje wo muri iri tsinda A, Vipers SC yo muri Uganda yatsinze Garde Républicaine FC yo muri Djibouti ibitego 3-0. Ibi bikaba bisobanuye ko APR FC ari yo ya nyuma muri iri tsinda, cyane ko ari yo yatsinzwe ibitego byinshi 5-0.

Abakinnyi ba APR FC babanje mu kibuga

11 ba Gor Mahia babanje mu kibuga

Mukura VS yatandukanye na Tomas Trucha atayitoje n'umunsi umwe

Mahame — 2026-07-20T18:02:17Z

Uyu mutoza w'imyaka 54 yari ageze mu Rwanda mu gitondo cyo ku Cyumweru tariki ya 19 Nyakanga 2026, aho yari aje gutangira amasezerano y'imyaka ibiri yari yaragiranye na Mukura VS. Icyakora, ku wa Mbere, iyi kipe yahise itangaza ko impande zombi zemeranyije gusesa ayo masezerano.

Mu itangazo yashyize ahagaragara, Mukura VS yavuze ko impamvu yo gutandukana na Trucha ari uko yabonye andi mahirwe y'akazi atashoboraga kwanga, bityo impande zombi zikaba zarabyumvikanyeho nta makimbirane abayeho.

Mu mashusho yasohowe n'iyi kipe, Tomas Trucha na we yemeje aya makuru, asobanura ko yafashe icyemezo cyo kwemera akandi kazi nyuma yo kubona amahirwe mashya.

Yagize ati: "Nabonye andi mahirwe ntashoboraga kwanga. Ndifuza kubwira abakunzi ba Mukura VS ko nta kindi kibazo gihari. Mbifurije ishya n'ihirwe mu rugendo rwanyu."

Amakuru yizewe avuga ko n'ubwo Trucha atigeze atoza umukino cyangwa ngo anayobore imyitozo n'imwe ya Mukura VS, iyi kipe yubahirije ibikubiye mu masezerano yari yagiranye na we.

Bivugwa ko Trucha yishyuye Mukura VS amafaranga angana n'imishahara y'amezi ane nk'uko amasezerano yabiteganyaga.

Andi makuru avuga ko uyu mutoza yamaze kubona akazi mu gihugu cya Maldives, ari na ho agiye gukomereza umwuga we.

Ibi bisize Mukura VS igomba guhita ishaka undi mutoza uzayifasha gutangira imyiteguro y'umwaka w'imikino wa 2026/2027, aho biteganyijwe ko imyitozo y'iyi kipe itangira kuri uyu wa Kabiri.

Biravugwa ko Rayon Sports yinjije asaga miliyoni 50 Frw ku Munsi w'Igikundiro

Mahame — 2026-07-20T11:28:41Z

Amakuru agaragaza ko n'ubwo ibi birori byimuriwe kuri Kigali Pele Stadium habura iminsi mike ngo bibe, ubwitabire bw'abafana butigeze bugabanuka kuko stade yakiriye abantu ku kigero cya 100%, bituma ikipe yinjiza amafaranga abarirwa muri miliyoni 49 Frw avuye mu matike gusa, ndetse amafaranga yose yinjijwe akaba arenga miliyoni 50 Frw.

Mu mukino wa gicuti wasoje ibyo birori, Rayon Sports yatsinze Gor Mahia yo muri Kenya ibitego 2-0, mu mukino waranzwe n'ibyishimo byinshi by'abafana b'iyi kipe.

Amatike yari yateganyijwe mu byiciro bitandukanye, aho kwinjira ahasanzwe byari 5,000 Frw, ahatwikiriye bikaba 10,000 Frw, muri VIP ari 50,000 Frw, mu gihe muri VVIP byari 100,000 Frw.

Amafaranga bivugwa ko yavuye mu matike mbere yo gukurwaho ibyakoreshejwe mu gutegura ibirori birimo umusoro ku nyongeragaciro (VAT) wa 18%, amafaranga yo gukodesha stade, ayishyurwa abacuruje amatike n'ibindi bikorwa byateguwe kugira ngo uyu munsi ugende neza.

Nyuma yo gukurwaho umusoro wa 18%, Rayon Sports yasigaranye miliyoni 40 Frw n'ibihumbi 180, mbere yo gukurwaho andi mafaranga ajyanye n'ikorwa ry'ibi birori.

Uyu mwaka, Umunsi w'Igikundiro wari wabanje guteganyirizwa kuri Stade Amahoro, ariko uza kwimurirwa kuri Kigali Pele Stadium nyuma y'uko impande zombi zitumvikanye ku giciro cyo gukodesha stade ndetse no ku buryo uburenganzira bwo gucuruza ibinyobwa n'ibiribwa bwari gutangwa.

Icyo cyemezo cyari cyateye impungenge bamwe bibaza niba kwimukira kuri stade ifite ubushobozi bwo kwakira abantu bake ugereranyije na Stade Amahoro yakira abasaga ibihumbi 45 bitari kugabanya ubwitabire cyangwa amafaranga yinjizwa.

Icyakora, abafana ba Rayon Sports bongeye kwerekana ubwitange bwabo, kuko Kigali Pele Stadium yakiriye abantu bose ishobora kwakira.

Umunsi w'Igikundiro watangiye gutegurwa na Rayon Sports mu 2019, ukaba uba buri mwaka mbere yo gutangira umwaka w'imikino.

Ni umunsi ikipe imurikiraho abakinnyi bashya b'amakipe y'abagabo n'abagore, ikereka abafana imyambaro mishya, ikanabahuza n'ikipe yabo binyuze mu bikorwa bitandukanye birimo n'umukino wa gicuti.

Ibyavuye muri Rayon Day 2026 bishimangira ko Umunsi w'Igikundiro umaze kuba kimwe mu bikorwa by'imikino bikurura abafana benshi mu Rwanda, ndetse bikaba n'isoko rikomeje gufasha Rayon Sports kongera ubushobozi bwayo mu rwego rw'imari mbere yo gutangira umwaka mushya w'imikino.

U Bwongereza bwegukanye umwanya wa gatatu mu Gikombe cy'Isi cya 2026 butsinze u Bufaransa 6-4

Mahame — 2026-07-18T23:41:52Z

Uyu mukino wari uwo gushaka ikipe isoza ku mwanya wa gatatu muri iri rushanwa, aho amakipe yombi yari yatsindiwe ku mikino ya 1/2, agasigara aharanira gusoreza imikino y'Igikombe cy'Isi 2026 ari mu mwanya w'icyubahiro.

Ubwongereza bwatangiye umukino neza cyane, busatira izamu ry'u Bufaransa kuva ku munota wa mbere. Ku munota wa 3, Declan Rice yafunguye amazamu atsindira u Bwongereza igitego cya mbere.

Ku munota wa 18, Ezri Konsa yatsinze igitego cya kabiri cy'u Bwongereza nyuma y'umupira mwiza yari ahawe na Declan Rice.

Bukayo Saka yaje gutsindira u Bwongereza ibindi bitego bibiri ku munota wa 37 n'uwaa 45+1, ku mupira byiza yahawe na Marcus Rashford na Eberechi Eze.

Igice cya mbere cyarangiye Ubwongereza buyoboye umukino ku bitego 4-0, ibintu byagaragazaga ko bwari buri mu mwanya mwiza wo kwegukana intsinzi.

Mu gice cya kabiri ariko, u Bufaransa bwagarutse bufite imbaraga ndetse bufite n'ishyaka ryo kwishyura, biza no kubahira Kylian Mbappé afungura amazamu ku munota wa 48 nyuma y'umupira yari ahawe na Michael Olise.

Bradley Barcola yatsinze icya kabiri ku munota wa 54, Mbappé yongera kwinjiza igitego cya gatatu ku munota wa 66, nabwo ahawe umupira na Olise.

Kugeza kuri uyu munota abantu benshi bari batangiye kubona ko u Bufaransa bushobora kwishyura ibitego byose bikaba biba intsinzi.

U Bufaransa bwakomeje gusatira bushaka kunganya, ariko u Bwongereza bwongera kubona igitego ku munota wa 87 kuri penaliti yatewe na Bukayo Saka, bituma umukino uba 5-3.

Mu minota y'inyongera, u Bufaransa bwongeye kugabanya ikinyuranyo ubwo Ousmane Dembélé yatsindaga igitego ku munota wa 90+6 ku mupira yari ahawe na Dayot Upamecano.

Ariko ku munota wa 90+8, Jude Bellingham yatsindiye Ubwongereza igitego cya gatandatu, ashyira iherezo ku nzozi z'Abafaransa, bari bafitanye icyizere cyo gushaka igitego cyo kunganya ngo bajye mu minota 30 y'inyongera.

Umukino warangiye Ubufaransa 4-6 Ubwongereza, bituma Ubwongereza bwegukana umudali w'umuringa, busoza ku mwanya wa gatatu mu Gikombe cy'Isi cya 2026.

Uyu kandi ni umukino usize Kylian Mbappé ayoboye urutonde rw'abamaze gutsinda ibitego byinshi muri iri rushanwa aho yinjije ibitego 10, hakaba bategerejwe niba Lionel Messi azabasha kubona ibitego birenze 2 ku mukino wa nyuma uzahuza Argentine na Esipanye kuri iki cyumweru, kugira ngo anyure kuri Kylian Mbappé.

FIFA yakuriyeho ibihano Rayon Sports nyuma yo gukemura ibibazo byayo na Drissa Kouyaté

Mahame — 2026-07-17T18:11:39Z

Ni amakuru akubiye mu ibaruwa FIFA yoherereje Rayon Sports kuri uyu wa 17 Nyakanga 2026, ivuga ko uru rubanza rwapfundikiwe burundu nyuma y'uko Drissa Kouyaté yemereye FIFA ko yahawe amafaranga yagombaga kwishyurwa.

Muri iyo baruwa yashyizweho umukono n'Umuyobozi ushinzwe imyitwarire muri FIFA, Americo Espallargas, iri shyirahamwe rivuga ko ryakiriye ibaruwa ya Drissa Kouyaté yemeza ko Rayon Sports yasohoje ibyo yasabwaga.

FIFA yagize iti: "Twafashe icyemezo cyo gufunga uru rubanza, kandi igihano cyo kubuzwa kwandikisha abakinnyi bashya cyari cyafatiwe Rayon Sports kivanyweho burundu."

Yakomeje isaba Ishyirahamwe ry'Umupira w'Amaguru mu Rwanda (FERWAFA) guhita rikuraho n'ibihano byose byari byashyiriweho Rayon Sports ku rwego rw'imbere mu gihugu bijyanye n'iki kibazo.

Icyakora, FIFA yasobanuye ko iki cyemezo kireba gusa urubanza rwa Drissa Kouyaté, bityo kikaba kidakuraho ibihano bishobora kuba bifitanye isano n'ibindi birego byaba bikiri mu nzira.

Iki cyemezo kije gishimangira ibyo Rayon Sports yari yatangaje ivuga ko ibibazo yari ifitanye na Drissa Kouyaté byari byarakemutse ku bwumvikane bw'impande zombi, ndetse ko inyandiko zibigaragaza zari zaramaze gushyikirizwa FIFA.

Uku gusobanura kwakurikiwe n'uko Drissa Kouyaté nawe ubwe yahamije ko nta kibazo agifitanye na Rayon Sports, ashimangira ko yibanze ku gufasha iyi kipe mu mwaka mushya w'imikino.

Yagize ati: "Nta kibazo mfitanye n'ikipe. Njye na Perezida twarabyumvikanyeho. Nishimiye kuba nkiri umukinnyi wa Rayon Sports kandi nibanze ku gukora umwaka mwiza w'imikino."

Iki cyemezo ni inkuru nziza ku bakinnyi, ubuyobozi n'abafana ba Gikundiro, cyane cyane mu gihe iyi kipe iri mu myiteguro y'amarushanwa atandukanye arimo CECAFA Kagame Cup, CAF Confederation Cup ndetse na Shampiyona y'u Rwanda, by'umwihariko Gikundiro ikaba iri kwitegura gukina umukino mpuzamahanga wa gicuti uzayihuza na Gor Mahia yo muri Kenya muri Rayon Day iteganyijwe kuri uyu wa 18 Nyakanga 2026, aho abafana bategereje kureba ikipe yabo yiganjemo abakinnyi bashya.

Kugeza ubu Rayon Sports imaze gusinyisha abakinnyi bashya 15 ndetse inongeramo abatoza bashya barimo Habimana Sosthène nk'Umutoza Mukuru Wungirije na Hugo Tricárico utoza abanyezamu.

Ibaruwa ya FIFA imenyesha Rayon Sports ko yakomorewe

Espagne isezereye Ubufaransa biyigeza ku mukino wa nyuma w'Igikombe cy'Isi 2026

Mahame — 2026-07-14T21:39:09Z

Uyu mukino watangiye amakipe yombi ashaka igitego hakiri kare. Gusa Espagne ni yo yabashije kwinjira mu mukino hakiri kare, biyihesha kubona igitego cya mbere cyabonetse ku munota wa 22 gitsinzwe na Mikel Oyarzabal kuri penaliti, nyuma y'uko Lamine Yamal akorewe ikosa mu rubuga rw'amahina.

Iki gitego kikaba ari bacyo rukumbi cyabonetse mu gice cya mbere, amakipe yombi arinda ajya kuruhuka Ari igitego kimwe cya Espagne ku busa bw'Ubufaransa.

Mu gice cya kabiri, Espagne yakomeje kwiharira umupira, maze ku munota wa 58 Pedro Porro atsinda igitego cya kabiri cyahaye iyi kipe batazira La Roja amahirwe akomeye yo kugera ku mukino wa nyuma.

Nubwo umutoza Didier Deschamps w'Ubufaransa yakoze impinduka zitandukanye agamije kongerera imbaraga ubusatirizi bwe burimo Kylian Mbappé, Ousmane Dembélé na Michael Olise, ntibyatanze umusaruro kuko ubwugarizi bwa Espagne bwakomeje guhagarara neza kugeza umukino urangiye.

Iyi ntsinzi ya Espagne iyihesheje itike yo kugera ku mukino wa nyuma w'Igikombe cy'Isi cya 2026, aho izahura n'izava hagati y'u Bwongereza na Argentine mu mukino wa kabiri wa 1/2 uteganyijwe kuri uyu wa Gatatu.

Drissa Kouyaté nawe yemeje ko ibibazo yari afitanye na Rayon Sports babikemuye mu bwumvikane

Mahame — 2026-07-14T11:54:28Z

Uyu munyezamu w'Umunya-Mali yabitangaje nyuma y'amakuru y'uko Rayon Sports yongeye gushyirwa ku rutonde rw'amakipe atemerewe kwandikisha abakinnyi bashya na FIFA, aho bamwe bari bahuje iki cyemezo n'ikibazo cyari hagati y'iyi kipe na Kouyaté.

Drissa Kouyaté yavuze ko nta kibazo agifitanye na Rayon Sports ndetse ko yumvikanye n'ubuyobozi bw'ikipe ku buryo buri ruhande rwanyuzwe.

Yagize ati: “Nta kibazo mfitanye n'ikipe. Njye na Perezida twaraganiriye kandi twumvikanye kuri byose. Nibanze cyane ku gukora umwaka mwiza w'imikino namwe.”

Yakomeje agira ati: “Nzaharanira umwanya wanjye hano. Nishimiye kuba ndi kumwe n'abafana ba Rayon Sports. Sinshaka ko mugira impungenge kubera ibiri kuvugwa ku mbuga nkoranyambaga. Nibanze kuri iyi kipe kuko dufite byinshi byo gukora.”

Aya magambo ya Kouyaté aje mu gihe abakunzi ba Rayon Sports bari bafite impungenge nyuma y'uko ku wa Mbere tariki ya 13 Nyakanga 2026, FIFA yongeye gushyira iyi kipe ku rutonde rw'amakipe atemerewe kwandikisha abakinnyi kugeza muri 2027.

Rayon Sports yahise isobanura ko ikibazo yari ifitanye na Drissa Kouyaté cyamaze gukemuka, ndetse ko yamaze gushyikiriza FIFA ibyangombwa byemeza ubwumvikane bwagezweho hagati y'impande zombi.

Ubuyobozi bwa Gikundiro bwagize buti: “Ikibazo cyavuzwe hagati ya Rayon Sports n'umukinnyi wayo Drissa Kouyaté kimaze iminsi cyarakemutse ku bwumvikane bw'impande zombi.”

Bwanongeyeho ko uyu munyezamu akiri umukinnyi wa Rayon Sports kandi ko ari mu kazi nk'ibisanzwe, kuko nta kibazo na kimwe agifitanye n'ikipe.

Umunyamabanga akaba n'Umuvugizi wa Rayon Sports, Gakwaya Olivier, na we yatangarije RBA ko iyi kipe yari yarakemuye ikibazo na Kouyaté binyuze mu bwumvikane, aho bumvikanye uburyo bwo kwishyura igice cy'amafaranga yasabwaga.

Yasobanuye ko FIFA yasabye ko uyu mukinnyi na we yemeza ubwo bwumvikane mu nyandiko igomba gushyikirizwa iri shyirahamwe mpuzamahanga ry'umupira w'amaguru mu gihe cy'iminsi itanu.

Iki kibazo kije mu gihe Rayon Sports iri mu myiteguro ikomeye y'umwaka w'imikino wa 2026/27, aho imaze gusinyisha abakinnyi bashya 15 ndetse ikongeramo abatoza bashya barimo Habimana Sosthène nk'Umutoza Mukuru Wungirije na Hugo Tricárico utoza abanyezamu.

Kugeza ubu bamwe mu bakinnyi bamaze kugera mu mwiherero w'ikipe uri kubera mu Karere ka Gicumbi, aho Rayon Sports yitegura amarushanwa arimo CECAFA Kagame Cup, CAF Confederation Cup n'andi marushanwa yo mu gihugu.

Mbere yo gutangira umwaka w'imikino wa 2026-2027, Gikundiro izakina umukino mpuzamahanga wa gicuti na Gor Mahia yo muri Kenya mu birori bya Rayon Day bizaba ku wa 18 Nyakanga 2026, umukino utegerejwe n'abakunzi b'iyi kipe bashaka kubona uko ikipe nshya ihagaze.