Imirasire.rw

Gakenke: Abagabo batanu bafatanwe ibiro 10 by'urumogi

Mahame — 2026-10-22T14:52:45Z

Aba bagabo bafashwe ku makuru yatanzwe n'abaturage, bavuga ko basanzwe bakorana mu gusangira amakuru, gushaka isoko ry'ibiyobyabwenge no kubishakira inzira biva mu bihugu bituranyi kugira ngo bibagereho nta nkomyi.

Abafashwe kandi bakekwagaho no kugira uruhare mu gukwirakwiza Kanyanga aho batatu muri bo bafashwe bamaze kuzimenya nyuma y'uko bari bamenye ko barimo gushakishwa kugira ngo basibanganye ibimenyetso, undi akayisanganwa mu icupa.

Umuvugizi wa Polisi mu Ntara y'amajyaruguru CIP Ignace Ngirabakunzi avuga ko nta muntu ukwiye kureberera abagira uruhare mu biyobyabwenge kuko byangiza sosiyete.

Ati “Ibiyobyabwenge bigira ingaruka haba k'ubikwirakwiza, ubikoresha n'imiryango yabo ndetse n'igihugu muri rusange bityo nta muntu ukwiye kubiha icyuho, tubyamagane.”

Yibutsa abaturage ko bafite uruhare runini mu kurwanya ibigira uruhare mu kubahungabanyiriza umutekano birimo n'ibiyobyabwenge, batanga amakuru y'ababigiramo uruhare kugira ngo bafatwe bityo boye gukomeza kwangiza abaturarwanda.

Yakomeje agira ati: “Iyo umutekano uhungabanye, umuturage niwe bigiraho ingaruka cyane bityo akwiye kumva ako afite inshingano zo gufatanya n'inzego zibishinzwe kurwanya uwo ariwe wese wawuhungabanya.”

Abafashwe uko ari 5 bafungiye kuri station ya Polisi ya Gakenke kugira ngo bakurinkiranwe uko amategeko abiteganya.

Urumogi ruri mu cyiciro cy'ibiyobyabwenge bihambaye aho uhamije n'urukiko icyaha cyo kurutunda, kurukwirakwiza no kurucuruza ashobora guhanishwa igifungo cya burundu n'ihazabu y'amafaranga y'u Rwanda arenze miliyoni makumyabiri (20.000.000 FRW) ariko atarenze miliyoni mirongo itatu (30.000.000 FRW).

Minisitiri Utumatwishima yasabye urubyiruko kudashaka kunywa inzoga nk'abakeneye kuzimaraho

Mahame — 2026-10-21T13:38:08Z

Yabigarutseho kuri uyu wa 21 Ukwakira 2026, ubwo Perezida wa Repubulika, Paul Kagame, yaganiraga n'urubyiruko rugera ku bihumbi 10 rwaturutse mu byiciro bitandukanye by'imibereho n'imirimo, mu gikorwa cya Meet the President cyabereye muri BK Arena i Kigali.

Minisitiri w'Urubyiruko n'Iterambere ry'Ubuhanzi, Dr. Utumatwishima Jean Nepo Abdallah

Minisitiri Utumatwishima yavuze ko urubyiruko rudakwiye gutekereza ko rushobora kuzuza inshingano rufite mu iterambere ry'igihugu rwishora mu kunywa inzoga cyangwa gukoresha ibiyobyabwenge.

Yagize ati: “Mu nshingano urubyiruko rufite, ntibikwiriye kumva ko ruzazikora runywa inzoga nk'aho dushaka kuzimara cyangwa se ibiyobyabwenge nk'aho twabigize ibintu byemewe.”

Yashimangiye ko kurwanya ibiyobyabwenge n'inzoga zikoreshwa nabi bidakwiye gufatwa nk'inshingano z'inzego za Leta gusa, ahubwo ko buri wese mu rubyiruko akwiriye kugira uruhare mu gukumira ibyo bikorwa no gufasha bagenzi be kubyirinda.

Ati: “Buri wese akwiriye kuba ijisho rya mugenzi we, ubonye mugenzi we atangiye kurengera akamuramira, ntatume ateshuka kandi tugakomeza gutanga amakuru y'aho tuzi za nzoga twaciye.”

Ubu butumwa buje mu gihe ibiyobyabwenge n'inzoga biri mu bibazo byagaragajwe nk'ibihangayikishije urubyiruko, hamwe n'ubushomeri, ubuzima buhenze, amakimbirane mu miryango n'igitutu gituruka ku mbuga nkoranyambaga.

Mu buhamya bwatanzwe muri ibi biganiro, bamwe mu rubyiruko bagaragaje uburyo kwishora mu nzoga n'ibiyobyabwenge byabagizeho ingaruka zikomeye, abandi bagaragaza ko ibibazo by'imibereho n'amahirwe make bishobora gutuma bamwe bishora mu bikorwa bibangiriza ahazaza.

Urugero ni Shimirwa Palemon wo mu Murenge wa Rubaya mu Karere ka Gicumbi, wavuze ko yigeze gukorana n'abantu bacuruzaga inzoga zitemewe bazinjiza mu gihugu, na we aza kwisanga yarabaswe na Kanyanga, kugeza ubwo ubuzima bumugoye.

Yavuze ko amaze kwinjira muri izo nzoga yatangiye gusesagura amafaranga yari yarazigamye, ubuzima burushaho kumugora.

Undi musore witwa Shimwa na we yavuze ko nyuma yo guhabwa ubufasha mu kigo ngororamuco, yaje guhindura imyitwarire, agabanya inzoga yanywaga, atangira kwiga ububaji no gushaka uko yakwiteza imbere.

Yavuze ko mu 2024 yitabiriye amarushanwa ya YouthConnekt Awards, aho yafatiye icyemezo cyo kureka inzoga burundu.

Minisitiri Utumatwishima yasabye urubyiruko kudafata inzoga nk'igikoresho cyo kwishimisha cyangwa kwikuramo ibibazo, ahubwo rugashyira imbere inshingano zarwo, ubuzima bwiza n'imigambi yarwo y'igihe kizaza.

Yagaragaje ko kurwanya ibiyobyabwenge bisaba ubufatanye bw'urubyiruko ubwaryo, imiryango, abayobozi n'izindi nzego, kugira ngo abari mu kaga bafashwe hakiri kare.

Ibarura Rusange rya Gatanu ry'Abaturage n'Imiturire ryo mu 2022 ryagaragaje ko abana n'urubyiruko batagejeje ku myaka 30 bangana na 65,3% by'abaturage b'u Rwanda, ni ukuvuga hafi miliyoni 8,65 mu baturage 13.246.394.

Ubu bwinshi bw'urubyiruko mu gihugu butuma kururinda ibiyobyabwenge no kurufasha kugira imyitwarire myiza ari ingenzi mu kubaka ejo hazaza h'u Rwanda.

Minisitiri Utumatwishima yasabye urubyiruko kumva ko inshingano zo kwiteza imbere no kubaka igihugu zidashobora kugendana no gufata inzoga n'ibiyobyabwenge nk'ibintu bisanzwe, ahubwo ko bisaba kugira intego, gufata imyanzuro myiza no gufashanya mu gihe hari ugaragaza ibimenyetso byo kurengera.

Perezida Kagame yasabye urubyiruko kudaheranwa n'ibibazo no kwirinda ibiyobyabwenge

Mahame — 2026-10-21T13:31:38Z

Ibi Umukuru w'Igihugu yabigarutseho kuri uyu wa 21 Ukwakira 2026, ubwo yaganiraga n'urubyiruko rugera ku bihumbi 10 rwaturutse mu byiciro bitandukanye by'imibereho n'imirimo, rwari rwitabiriye igikorwa cya Meet the President cyabereye muri BK Arena i Kigali.

Nyakubahwa Perezida wa Repubulika y'u Rwanda, Paul Kagame, aha impanuro urubyiruko rwari muri BK Arena

Perezida Kagame yavuze ko urubyiruko ruri mu myaka ikomeye ishobora kugira uruhare rukomeye mu buzima bw'umuntu, kuko ari igihe ashobora kwiyubaka cyangwa kwangiza ahazaza he bitewe n'imyitwarire ahitamo.

Yagize ati: “Muri iyi myaka tuvuga muri mo, ni yo myaka umuntu ahindukira ukazayirangiza uri muzima cyangwa byanze. Iyi myaka harimo kwihuta cyane, ibintu bijyana n'ubuzima bw'umuntu, uba muzima cyangwa ukangirika.”

Yagaragaje ko nubwo umuntu ashobora kuba yaranyuze mu bihe bibi cyangwa agatakaza amahirwe, atagomba kumva ko ubuzima bwe bwarangiye, kuko igihe cyo kwisubiraho no guhindura icyerekezo kigihari.

Ati: “N'iyo myaka usanga watakaje, iyo uzanzamutse jya umenya ngo haracyari igihe cyo kugira ngo wongere ubihindure ugire ubuzima bwiza. Ntukihebe, ngo uvuge ngo amazi yarenze inkombe. Ararenga ariko ashobora gusubizwa aho yaturutse. Ntimukihebe.”

Ubu butumwa yabutanze mu gihe urubyiruko ruhanganye n'ibibazo bitandukanye birimo ubushomeri, ubuzima buhenze, amakimbirane mu miryango, ibiyobyabwenge n'igitutu gituruka ku mbuga nkoranyambaga.

Perezida Kagame yanagarutse ku ngaruka z'inzoga ku buzima bw'umuntu, asobanura ko hari abazinywa bibwira ko zibafasha kwibagirwa ibibazo cyangwa guhangana n'ubuzima bugoye, nyamara ahubwo zishobora kubangiza.

Yavuze ko inzoga zishobora gutuma umuntu ahora ashaka kwigizayo ibibazo aho kubikemura, akibeshya ko ari kuruhuka kandi mu by'ukuri ari kwangiza ubuzima bwe.

Ati: “Izo nzoga nta nubwo ziryoshye. Baravuga ngo bakurikiramo uburyohe, nta burimo, ariko nyine biguma bijya mu mutwe, rimwe hari ababikora bibwira ngo bibafasha kunyura mu buzima bukomeye kuko urasinzira, ntabwo ari ugusinzira, uraraba. Ni nk'ikinya. Ni uguhora witera ikinya ngo ubone ko umunsi wahita. Ntabwo ari byo.”

Yashimangiye ko icyiza ari uguhangana n'ibibazo by'ako kanya, umuntu azi ko imyitwarire myiza n'imyanzuro ifite intego bishobora kumugeza ku buzima bwiza mu gihe kiri imbere.

Ati: “Ibyiza ni uko wahangana n'ibitaryoshye n'ibitakuryoheye by'ako kanya ariko uzi ngo ubifitemo ubuzima bwiza buzakugeza ku biryoshye. Imyifatire rero y'abantu ni ingenzi.”

Mu kugaragaza uburemere bw'ingaruka z'inzoga, Perezida Kagame yanatanze urugero rw'umuntu bakoranye wabaswe na zo ku buryo byamugoraga kuboneka igihe yari amukeneye mu kazi.

Yavuze ko yabanje kumugirira impuhwe, atekereza ko ashobora kuba ahugiye mu nshingano z'umuryango, ndetse agerageza no kumworohereza mu kazi kugira ngo abone umwanya uhagije. Icyakora, nyuma yaje kubona ko ikibazo cyari gikomeye kurushaho.

Perezida Kagame yavuze ko hari igihe yigeze gutuma abashinzwe umutekano kumushaka, aza kumubona ageze mu rugo atabasha no kuzamuka ingazi neza kubera uko yari ameze.

Umukuru w'Igihugu kandi yasabye urubyiruko kutagendera gusa ku byo abandi babona ko ari byiza, ahubwo rukajya rufata umwanya wo kwisuzuma, rukamenya amahame rugenderaho n'icyo rushaka kugeraho mu buzima.

Ati: “Ntugomba guhora ubaza ngo ariko mu bantu icyo abantu bavuga ko ari kizima ni iki nakurikiza? Oya, jya wiheraho uvuge ngo ari ko njye nk'umuntu, icyo nita kizima ni iki? Wakwiheraho ukavuga ngo ikizima ni iki. Ntabwo ugomba kurebera ku bandi.”

Yashimangiye ko umuntu akwiriye kwigira ku bumenyi n'ubunararibonye, agahitamo ibimufitiye akamaro kandi akirinda ibishobora kumusubiza inyuma.

Ati: “Ikintu cyose aho uri ntugate umwanya. Wige, ukore, ndetse ushakishe kwishyiramo kumenya ikizima ni ikihe, ikitari ikizima ni ikihe. Ikizima ukagikorera, ikitari kizima ukakirinda.”

Perezida Kagame yanagarutse ku ruhare rw'urubyiruko mu kubaka igihugu, avuga ko abari mu myaka y'ubuto n'abumva ko batakiri bato bose bashobora gufatanya mu rugendo rw'iterambere.

Yagize ati: “Ariko njye mfite akarusho. Akarusho mfite ni uko arirwo rwanze kumvamo. Ubwo se urumva atari amahirwe. Ubwo rero twese uko turi aha, ari abanze kuva mu rubyiruko, ari abo rwanze kuvamo, ari abarurimo nyakuri, turi bamwe. Turi bamwe, turi hamwe, ibisigaye ni ukwiyubaka, ni ukubaka imiryango yacu, ubuzima bwacu no kubaka igihugu.”

Ibi yabivuze agaragaza ko kubaka igihugu bitareba icyiciro kimwe gusa, ahubwo ko ari inshingano ihuriweho n'Abanyarwanda bose, buri wese akagira uruhare mu iterambere rye, iry'umuryango we n'iry'igihugu muri rusange.

Mu butumwa bwe, Perezida Kagame yanagaragaje ko ubumenyi ari ingenzi mu buzima, ashingiye ku byo yibuka akiri umwana ubwo yakurikiranaga ikiganiro Wari uzi ko kuri Radiyo Rwanda, akuramo amasomo yaje kumufasha mu bihe byakurikiyeho.

Yasobanuye ko icyo kiganiro cyatangaga inyigisho ku bintu bitandukanye byo mu buzima, harimo n'uburyo bwo kwifashisha ibimera mu kuvura ibikomere. Yavuze ko nyuma y'imyaka myinshi yaje kwibuka inyigisho yari yarumvise muri icyo kiganiro, akagerageza gukoresha ikimera cy'inyabarasanya igihe yari yakomeretse.

Iyi nkuru yayikoresheje ashimangira ko umuntu adakwiriye gupfusha ubusa umwanya afite, ahubwo agaharanira kwiga, gushaka ubumenyi no kumenya gutandukanya ibimufitiye akamaro n'ibimwangiriza ubuzima.

Ibi biganiro byitabiriwe n'urubyiruko rugera ku bihumbi 10, mu gihe Ibarura Rusange rya Gatanu ry'Abaturage n'Imiturire ryo mu 2022 ryagaragaje ko abana n'urubyiruko batagejeje ku myaka 30 bari 65,3% by'abaturage b'u Rwanda, bangana na miliyoni 8,65 mu baturage 13.246.394.

Igikorwa cya “Meet the President” giheruka kuba muri Gicurasi 2024, ubwo Perezida Kagame yahuraga n'urubyiruko rw'abakorerabushake rugera ku 7.500 muri BK Arena.

Muri biganiro byo kuri uyu wa 21 Ukwakira 2026, ubutumwa bw'Umukuru w'Igihugu bwibanze ku gukomera ku mahitamo meza, kwirinda ibiyobyabwenge, kudacika intege mu gihe cy'ibibazo no gukoresha ubumenyi n'ubushobozi buri wese afite mu kwiyubaka no guteza imbere igihugu.

Abadepite banenze imikorere mibi ya WASAC ituma hari abaturage batagerwaho n'amazi meza

Mahame — 2026-10-21T11:48:46Z

Ibi byagarutsweho ku wa 20 Ukwakira 2026, ubwo Umunyamabanga wa Leta muri Minisiteri y'Ibikorwa Remezo yari imbere y'Abadepite, bagaragaza impungenge ku buryo WASAC isohoza inshingano zayo zo kugeza amazi meza ku baturage.

Abadepite bagaragaje ko ibibazo by'ibura ry'amazi bikomeje kugaragara mu bice bitandukanye by'Umujyi wa Kigali, bikaba bitera kwibaza ku mikorere y'iki kigo n'uburyo gishyira mu bikorwa inshingano zacyo.

Bavuze ko bidakwiye ko abaturage bamara igihe kirekire badafite amazi, kandi ari imwe muri serivisi z'ibanze zikenerwa buri munsi mu buzima bwabo, haba mu kunywa, gutegura amafunguro, gukora isuku no mu bindi bikorwa byo mu ngo.

Ikibazo cyagaragajwe cyane ni imisaranganyirize y'amazi mu Mujyi wa Kigali, aho hari abaturage bamara amezi arenga abiri amazi atagera mu ngo zabo. Hari n'aho amazi agera ariko akaba adahagije cyangwa akaza rimwe na rimwe, bigatuma abaturage batabona serivisi yizewe.

Ibi bibazo bigira ingaruka ku mibereho y'abaturage, kuko iyo amazi abuze bahatirwa gushaka ubundi buryo bwo kuyabona, bikaba byabongerera amafaranga bakoresha ndetse bikanabagora mu kubahiriza isuku ya buri munsi.

Abadepite bagaragaje ko imikorere ya WASAC ikwiye gusuzumwa, cyane cyane mu bijyanye no gukwirakwiza amazi, gukurikirana imikorere y'imiyoboro no gukemura ibibazo by'abaturage batabona serivisi uko bikwiye.

Umuyobozi wa Komisiyo ishinzwe gukurikirana imikoreshereze y'imari n'umutungo bya Leta (PAC) na we yagaragaje ibibazo bifitanye isano n'imikorere ya WASAC, by'umwihariko mu gutanga no gukwirakwiza amazi.

Ibyagarutsweho byibanze ku nshingano z'iki kigo n'uburyo zishyirwa mu bikorwa, hibandwa ku kuba amazi agomba kugera ku baturage bayakeneye no ku buryo ibibazo by'abayabura bikemurwa.

Kuba hari abaturage bamara igihe kirekire badafite amazi mu gihe abandi bayabona mu buryo budahoraho bigaragaza ko hakenewe ingamba zifatika zo kunoza imisaranganyirize yayo no gukemura ibibazo bituma atagera ku bayakeneye.

Amazi meza ni ingenzi mu kurengera ubuzima bw'abantu no kubafasha kugira isuku ihagije mu ngo. Iyo atabonetse uko bikwiye, bishobora kubangamira imirimo ya buri munsi no kongera ingorane zishingiye ku buzima n'imibereho myiza.

Ibyagaragajwe n'Abadepite byongeye kugaragaza akamaro ko gukurikirana imikorere y'ibigo bya Leta, harebwa niba serivisi bishinzwe gutanga zigera ku baturage ku gihe kandi mu buryo buhoraho.

Haracyakenewe ibisobanuro birambuye ku mpamvu zituma bamwe mu batuye Umujyi wa Kigali bamara amezi arenga abiri badafite amazi, ndetse n'ingamba WASAC yafashe cyangwa iteganya gufata kugira ngo iki kibazo gikemuke.

Abaturage bakeneye kubona ibisubizo bifatika ku bibazo by'ibura ry'amazi, birimo kunoza imiyoboro, gukemura ibibazo by'imisaranganyirize no kongera ubushobozi bwo kugeza amazi meza ku bayakeneye.

Kunonosora imikorere ya WASAC no gukemura ibibazo byagaragajwe n'Abadepite ni ingenzi kugira ngo abaturage babone amazi meza mu buryo buhoraho, bwizewe kandi bujyanye n'ibyo bakenera mu buzima bwa buri munsi.

Sergeant Robert yishwe n'abantu bataramenyekana

Mahame — 2026-10-18T14:20:29Z

Amakuru y'urupfu rwa Sergeant Robert yatangiye gukwirakwira mu gitondo cyo ku wa Gatandatu, tariki ya 17 Ukwakira 2026, cyane cyane ku mbuga nkoranyambaga zikoreshwa na bamwe mu Banyarwanda bahunze igihugu.

Amakuru atandukanye avuga ko Kabera Robert yishwe akaswe umutwe ubwo yari ahantu yari afite umushinga wo kubaka inzu. Bikekwa ko yishwe mu ijoro ryo ku wa Gatanu rishyira ku wa Gatandatu, nyuma y'uko umurambo we ubonywe utariho umutwe.

Kugeza ubu, ntiharamenyekana abantu baba baramwishe, impamvu yaba yarabateye kumwica cyangwa uko ubwo bwicanyi bwakozwe.

Nubwo amakuru y'urupfu rwe yakomeje gukwirakwira ku mbuga nkoranyambaga, amakuru aturuka ku bantu batandukanye, barimo abo bavuganaga, na yo yemeza ko yapfuye.

Sergeant Robert yahunze u Rwanda mu Ugushyingo 2020, nyuma y'uko igisirikare cy'u Rwanda gitangaje ko Ishami ry'Ubushinjacyaha bwa Gisirikare (MPD) ryatangiye iperereza ku birego by'uko yaba yarasambanyije umwana we.

Icyo gihe, igisirikare cy'u Rwanda cyavuze ko ibyaha yakekwagaho bivugwa ko byabaye ku wa 21 Ugushyingo 2020 mu Murenge wa Ndera, mu Karere ka Gasabo.

Nyuma yo kuva mu Rwanda, Kabera Robert yaje kumvikana avugira muri Uganda, aho yemezaga ko yahungiye. Yaje kandi kwiyunga ku barwanya ubutegetsi bwa Uganda, barimo abo mu ihuriro RNC ryashinzwe n'abarimo Kayumba Nyamwasa.

Mu bihe bitandukanye, yagiye agaragaza ko ubuzima bw'ubuhunzi bumugoye, avuga ko yari ahangayikishijwe no kubona amaramuko.

Yigeze kugaragara akora akazi ko kubumba amatafari ya rukarakara yo kubakisha amazu, mu rwego rwo gushaka imibereho, bituma abantu batandukanye bamukusanyiriza inkunga yo kumufasha.

Muri Gicurasi 2022, Kabera Robert yatawe muri yombi n'inzego z'umutekano za Uganda, zimukekaho gutunga intwaro mu buryo bunyuranyije n'amategeko.

Nyuma yarekuwe by'agateganyo, ategekwa kujya yitaba ubushinjacyaha igihe cyose yaba akenewe.

Kabera Robert yari azwi cyane mu Rwanda kubera ubuhanzi bwe akiri mu Ngabo z'u Rwanda, aho yakoraga muri Military Band. Izina rya “Sergeant Robert” ni ryo ryatumye amenyekana mu bakurikirana umuziki, mbere y'uko ahunga igihugu.

Kugeza ubu inzego zishinzwe umutekano za Uganda ntacyo ziratangaza ku rupfu rwa Sergeant Robert.

Black Bulls itumye abafana ba Rayon Sports basetse aba APR FC bataha barira

Mahame — 2026-10-17T18:59:31Z

Uyu mukino wabereye kuri Stade Amahoro i Kigali kuri uyu wa 17 Ukwakira 2026, aho Rayon Sports yari yakiriye Black Bulls ifite intego yo gutangira neza urugendo rwo gushaka itike yo gukomeza mu kindi cyiciro cy'iri rushanwa rihuza amakipe yabaye aya mbere iwayo muri Afurika.

Gutsindwa kwa Rayon Sports kwaje gukurikira ukw'ikipe ya APR FC, na yo yari yakiriye Zamalek SC yo mu Misiri ku wa 16 Ukwakira 2026, ikayitsinda igitego 1-0 mu mukino ubanza w'ijonjora rya kabiri rya CAF Champions League.

Ibi byatumye abafana ba Rayon Sports bagaragaza ibyishimo nyuma yo kubona mukeba wabo atsinzwe, ariko na bo ntibatinze guhura n'agahinda ubwo ikipe yabo yatsindwaga na Black Bulls, mu mukino bari bizeye ko ishobora kwitwaramo neza imbere y'abafana bayo.

Mu gice cya mbere cy'umukino, Rayon Sports na Black Bulls zagerageje kwerekana imbaraga no gushaka uburyo bwo kugera imbere y'izamu ry'indi kipe, ariko amakipe yombi arinda neza izamu ryayo, igice cya mbere kirangira nta gitego kiraboneka.

Rayon Sports yari ifite amahirwe yo gukinira imbere y'abafana bayo, ariko ntiyabasha kuyabyaza umusaruro ngo ibone igitego cyayifasha kuyobora umukino.

Black Bulls na yo yakomeje kwihagararaho, itanga icyizere ko ishobora kubona uburyo bwo gutsinda mu gice cya kabiri.

Amakipe yombi yagiye kuruhuka anganya 0-0, buri ruhande rugikeneye gushaka uburyo bwo gufungura amazamu mu minota 45 yari isigaye.

Mu gice cya kabiri, Black Bulls yagarutse ifite imbaraga zo gushaka igitego, iza kukibona ku munota wa 54 w'umukino, gitsinzwe na Abdu Gueye.

Iki gitego cyashyize Rayon Sports ku gitutu gikomeye, kuko yahise isabwa gushaka uko yishyura kugira ngo ibashe kwiyongerera amahirwe mbere yo kujya gukina umukino wo kwishyura muri Mozambique.

Rayon Sports yakomeje gushaka igitego cyo kwishyura, ariko ubwugarizi bwa Black Bulls buyibera ibamba, ibura amahirwe yo gutsinda.

Umunyezamu wa Black Bulls, José Ventura, na we yakomeje kwitwara neza, afasha ikipe ye gukomeza kuyobora umukino.

Mu gihe Rayon Sports yari igikomeje gushaka uko yishyura, Black Bulls na yo ntiyigeze ireka gukoresha amahirwe yabonaga ngo irusheho gushyira umukino mu maboko yayo.
Mu minota y'inyongera, ku munota wa 90+4, izamu rya Rayon Sports ryari ririnzwe na Dande Junior ryinjiyemo igitego cya kabiri cya Black Bulls, gishimangira intsinzi y'iyi kipe yo muri Mozambique.

Umukino warangiye Rayon Sports itsinzwe ibitego 2-0, biyiha akazi gakomeye ko gushaka uko yazishyura mu mukino wo kwishyura uteganyijwe ku wa 24 Ukwakira 2026 muri Mozambique.

Gutsindwa ibi bitego bibiri mu rugo ni igihombo gikomeye kuri Rayon Sports, yari yizeye gukoresha Stade Amahoro n'abafana bayo nk'intwaro yo gutangira neza iri jonjora.
Iyi kipe irasabwa kuzitwara neza cyane mu mukino wo kwishyura kugira ngo igire amahirwe yo gukomeza mu irushanwa.

Rayon Sports yari yabanje kugera muri iri jonjora nyuma yo gusezerera Panthère Sportive du Ndé, mu gihe Black Bulls na yo yari yasezereye Atomic Ngome ku giteranyo cy'ibitego 1-0.

Ku bafana ba Rayon Sports, gutsindwa na Black Bulls byabaye nk'ihinduka ry'amarangamutima mu gihe gito. Bari batashye bishimiye ko APR FC itsinzwe na Zamalek, ariko na bo ikipe yabo iraye itsinzwe ibitego bibiri mu rugo, ibyishimo byabo bihinduka agahinda.

Ibitaro bya Butaro bitanga asaga miliyoni 2 mu kwita ku barwayi bafite indwara zidakira batereranwa n'ababo

Mahame — 2026-10-17T13:49:00Z

Bamwe mu barwayi bari kuvurirwa kuri ibi bitaro badafite abarwaza, bavuga ko bazanywe n'abo mu miryango yabo, ariko nyuma bakabasiga mu bitaro bakigendera, bagasigara barwana no kwirwaza kandi bafite uburwayi busaba kwitabwaho.

Umwe muri aba avuga ko mukuru we yamusize mu bitaro, nubwo rimwe na rimwe amuhamagara kuri telefone, ariko ntaze kumufasha mu byo akeneye.

Ati: “Ndihano njyenyine n'ubundi. Nyine naraje, mukuru wanjye ansiga ahangaha arigendera. Kumpamagara arampamagara ariko bikarangiriraho. Narabihoreye, njye ndirwaza, mba ahongaho.”

Mugenzi we na we avuga ko yagerageje kuvugana n'abo mu muryango we ngo baze kumureba, ariko bakamubwira ko agomba kwiyitaho.

Ati: “Nonese ko nabaterefonnye ntibaze ngo bandebe, ibyo kundeba barambwira ngo oya, ngo nirwaze, ngo ninibesheho njyenyine, ngo nirwaze.”

Dr. Egide Mpanumusingo

Umuryango Inshuti mu Buzima (Partners In Health Rwanda), ufasha abarwayi bo mu bitaro bya Butaro no mu bindi bice by'igihugu, uvuga ko buri mwaka ufatanya n'ibi bitaro kwita ku barwayi batereranwe n'imiryango yabo, harimo kubashakira ababarwaza no kubafasha kubona ibikenewe mu gihe cy'uburwayi.

Dr. Egide Mpanumusingo, Umuyobozi w'Umuryango Inshuti mu Buzima (Partners In Health Rwanda) mu Karere ka Burera, aganira na RBA dukesha iyi nkuru, yavuze ko bamwe mu bantu batererana abarwayi baba babiterwa no kubona ko uburwayi bukomeye, cyane cyane kanseri, butazakira, bikabatera gutakaza icyizere.

Ati: “Ugasanga agize amahitamo yo kugira ngo amusige. Abo navuga ko ari abarwayi bo mu mutwe, kenshi ni bo bakunze kugaragara, ariko noneho tukaba tugira rimwe na rimwe, navuga nti, nk'abandi baza bafite uburwayi bukomeye nka kanseri, cyane cyane abantu bavuye hanze. Yabona ko ari mu gihe navuga ko arembye cyane, ngira ngo niba rimwe na rimwe aba yibaza ati ‘ese uyu murambo nzawutwara nte? Ese ko mbona nta kintu kiri kuvamo?' bagahitamo kugira ngo babate.”

Dr. Mpanumusingo avuga ko iyo bamenye ko umurwayi yatereranywe, bagerageza kumufasha no kumuhumuriza kugira ngo yumve ko atari wenyine mu rugendo rwo kwivuza.

Ati: “Ariko turafatanya iyo twashoboye kubimenya, dushobora kumuhumuriza tukamwereka ko nta kintu na kimwe tutazakorana.”

Uyu muryango uvuga ko gushakira abarwayi batereranwe n'imiryango ababarwaza bitwara hafi ibihumbi 500 Frw buri mwaka, mu gihe kubitaho muri rusange bisaba hafi miliyoni imwe n'ibihumbi 600 Frw.

Dr. Rwema Sarah Kayesu, uhagarariye ibikorwa by'ubuvuzi mu bitaro bya Butaro

Ubuyobozi bw'Ibitaro bya Butaro buvuga ko ikibazo cy'abarwayi batereranwa kitagarukira ku gihombo cy'amafaranga gusa, kuko gishobora no gushyira ubuzima bwabo mu kaga. Ibi biba cyane cyane ku barwayi batarashobora kwiyitaho cyangwa gukurikiza amabwiriza y'abaganga badafite ubafasha.

Dr. Rwema Sarah Kayesu, uhagarariye ibikorwa by'ubuvuzi muri ibi bitaro, aganira na RBA, yasabye imiryango kwihanganira abarwayi no kubaba hafi, akibutsa ko kuvura indwara atari uguha umurwayi imiti gusa.

Ati: “Icyo twabasaba ni ukugira ngo bajye baza bihanganiye uburwayi, ni gahoro gahoro, kumuba hafi, ndetse n'iyo abonye icyo nakwita emotional support (ubufasha mu bijyanye n'amarangamutima) y'umuryango, y'inshuti n'abavandimwe, yaba mu buryo, kuko ntabwo kuvura ari imiti gusa.”

Akomeza avuga ko no guhumuriza umurwayi, kumutera imbaraga no kumwereka ko umuri hafi bishobora kugira uruhare mu rugendo rwe rwo gukira.

Ati: “Ariko no kubona ko uba hafi, akubwira ati ‘komera, humura, biragenda gutya', na byo ubwabyo bigira uruhare mu gukira k'umurwayi. Icyo twabasaba rero ni uko bazajya birinda gutererana abarwayi, kubajugunya, kuko biba ikibazo yaba ku bitaro, ndetse no ku muryango Nyarwanda muri rusange.”

Dr. François Uwinkindi, Umuyoboi w'Ishami rishinwe gukurikirana no kuvura indwara zitandura muri RBC

Dr. François Uwinkindi, Umuyoboi w'Ishami rishinwe gukurikirana no kuvura indwara zitandura mu Kigo Gishinzwe Ubuzima mu Rwanda (RBC), na we avuga ko ubuvuzi bw'indwara zitandura, zirimo kanseri n'izindi ndwara zikomeye, bukwiye kurenga imipaka y'ibitaro bukagera no mu miryango.

Asobanura ko umuntu urwaye indwara imaze igihe kirekire ashobora gukenera ubufasha burenze guhabwa imiti, kuko uburyo yitabwaho n'abamuzengurutse na bwo bugira uruhare mu mibereho ye no mu rugendo rwo kwivuza.

Ati: “Umuntu ufite uburwayi bw'umugongo cyangwa se ubundi burwayi amaranye igihe kirekire, guhabwa ubuvuzi ndetse n'abo babana babasha kumenya uburyo baherekeza uwo murwayi, ndetse n'uwo murwayi ntabashe kwirambirwa kuko umuryango umuri hafi kandi umufasha muri byose.”

Umuryango Inshuti mu Buzima uvuga ko buri mwaka ukoresha arenga miliyoni 532 Frw mu gufasha abarwayi, harimo amafaranga y'ingendo ku barwaye kanseri, ayo kubatunga n'ayo kwishyura imiti.

Ku munsi, Ibitaro bya Butaro byakira abarwayi bari hagati ya 180 na 200 baza kwivuza bagataha, mu gihe abandi baba bakeneye kuguma mu bitaro kugira ngo bakurikiranwe n'abaganga.

Ubuyobozi bw'ibi bitaro busaba imiryango y'abarwayi kwirinda kubatererana, bwibutsa ko kubaba hafi, kubafasha mu buzima bwa buri munsi no kubatera imbaraga ari ingenzi mu rugendo rwo kwivuza.

Mu mwaka ushize ku Isi hose abantu miliyoni 645 bahuye n'ikibazo cy'inzara

Mahame — 2026-10-17T11:36:07Z

Ibi yabigarutseho mu butumwa yatanze ku wa 16 Ukwakira 2026, ubwo Isi yizihizaga Umunsi Mpuzamahanga w'Ibiribwa, ugamije gukangurira ibihugu n'abafatanyabikorwa kurwanya inzara, guteza imbere imirire myiza no gushyigikira ubuhinzi burambye.

Umunyamabanga Mukuru wa UN, António Guterres

Guterres yavuze ko ibiribwa ari uburenganzira bw'ibanze bwa muntu, ariko ko abantu benshi bakomeje kubura ibiribwa bihagije, mu gihe abandi batabasha kubona indyo yuzuye kubera ibiciro biri hejuru.

Yagize ati: “Ibiribwa ni uburenganzira bw'ibanze bwa muntu. Nyamara, mu mwaka ushize abantu bagera kuri miliyoni 645 bahuye n'inzara, mu gihe abagera kuri miliyoni 2.7 batabasha kubona indyo yuzuye kandi nziza ku buzima.”

Yakomeje avuga ko ibibazo n'ihungabana bikomeje kugaragara hirya no hino ku Isi bihungabanya umusaruro w'ubuhinzi n'itangwa ry'ibiribwa, bikazamura ibiciro by'ibiribwa n'ifumbire, bityo indyo yuzuye ikarushaho kugora abantu benshi.

Yagaragaje ko Isi ifite ubumenyi, ikoranabuhanga n'ubushobozi bihagije byo kugaburira abantu bose, asaba ko ibyo byose bikoreshwa mu guhangana n'inzara no gutuma ibiribwa bifite intungamubiri biboneka ku giciro buri wese ashobora kubona.

Ati: “Dufite ubumenyi, ikoranabuhanga n'ubushobozi bwo kugaburira Isi. Igihe ni iki ngo tubikoreshe. Dufatanye kugira ngo buri muntu, aho yaba ari hose, abone ibiribwa bifite umutekano, intungamubiri n'igiciro kimworoheye.”

Umunsi Mpuzamahanga w'Ibiribwa wizihijwe mu gihe ibihugu bitandukanye bikomeje guhangana n'izamuka ry'ibiciro by'ibicuruzwa, cyane cyane ibikomoka ku buhinzi, imihindagurikire y'ikirere n'intambara zikomeje kubera mu bice bitandukanye by'Isi.

Ibi bibazo bihungabanya ibikorwa by'ubuhinzi, ubwikorezi n'itangwa ry'ibiribwa ku masoko, bigatuma ibiciro byiyongera, cyane cyane ku baturage bafite ubushobozi buke.

Izamuka ry'ibiciro by'ibikomoka kuri peteroli na ryo ryongera ikiguzi cy'ubwikorezi n'ibindi bikorwa bifasha kugeza umusaruro ku bawukeneye.

Insanganyamatsiko y'uyu mwaka igira iti: “Hanga udushya uyu munsi, maze ugaburire ejo hazaza.”

Ishimangira akamaro ko guteza imbere ibisubizo bishya byongera umusaruro w'ubuhinzi, bikarengera umutungo kamere kandi bigafasha abaturage kubona ibiribwa bihagije.

Umunsi Mpuzamahanga w'Ibiribwa washyizweho mu 1979, mu nama ya 20 y'Inama Rusange y'Ishami ry'Umuryango w'Abibumbye ryita ku Biribwa n'Ubuhinzi (FAO), utangira kwizihizwa ku nshuro ya mbere mu 1981.

Trump yakuyeho ibihano Amerika yari yarafatiye u Burusiya kubera intambara yo muri Ukraine

Mahame — 2026-10-17T05:40:02Z

Mu iteka yashyizeho umukono mu ijoro ryo ku wa 16 Ukwakira 2026, Trump yavuze ko kudashyira mu bikorwa bimwe muri ibyo bihano biri mu “nyungu z'igihugu” cya Amerika.

Ibi bibaye mu gihe iryo tegeko ryari riteganyijwe gutangira gukurikizwa ku Cyumweru, tariki ya 18 Ukwakira 2026, ndetse bikaba byiyongera ku mpungenge z'abanyapolitiki bo muri Amerika n'ibihugu by'inshuti zayo ku bijyanye n'imibanire y'iki gihugu n'u Burusiya.

Trump yari yashyize umukono ku itegeko riteganya ibyo bihano muri Nzeri 2026, rigamije kongera igitutu ku bukungu bw'u Burusiya kugira ngo bushyirweho igitutu kubera intambara bukomeje muri Ukraine.

Icyakora, icyemezo cye cyo kudashyira mu bikorwa bimwe muri ibyo bihano cyatunguranye, gituma abadepite n'abasenateri bo mu mashyaka yombi akomeye muri Amerika, aba-Républicains n'aba-Démocrates, bakigaragaza nk'icyemezo kitumvikana.

Impaka zikomeye kuri iki kibazo zaje nyuma y'uko Trump atangaje ko Amerika izagura mazutu mu Burusiya, mu rwego rwo kugabanya ibiciro by'ingufu muri Amerika mbere y'amatora ateganyijwe mu Ugushyingo 2026, azagena ishyaka rizagira ubwiganze mu Nteko Ishinga Amategeko.

Iri tegeko ryitiriwe Lindsey Graham, wahoze ari Umusenateri w'aba-Républicains uhagarariye Leta ya South Carolina, wari uzwiho gushyigikira cyane Ukraine mbere y'uko apfa ku wa 11 Nyakanga 2026.

Iri tegeko ryari rigamije guca intege ubukungu bw'u Burusiya binyuze mu bihano bikomeye byagombaga gufatirwa icyo gihugu n'ibihugu bikomeza kugura ingufu zacyo.

Rihaye Perezida wa Amerika ububasha bwo gushyiraho imisoro ya gasutamo igera ku 100% ku bicuruzwa bituruka mu bihugu bitanu bya mbere bigura peteroli na gaz by'u Burusiya, by'umwihariko u Bushinwa n'u Buhinde.

Ibyo bihano kandi byari biteganyirijwe Perezida w'u Burusiya, Vladimir Putin, abayobozi bakuru muri Guverinoma ye, amabanki n'ibindi bigo by'imari, ndetse n'amato atwara peteroli mu buryo bwa rwihishwa hagamijwe kunyura ku bihano bisanzweho.

Ku wa Kane, tariki ya 15 Ukwakira 2026, itsinda ry'abadepite n'abasenateri 20 bo mu mashyaka yombi ryandikiye Trump rimusaba kubahiriza iryo tegeko no gushyira mu bikorwa ibihano biteganyijwemo.

Muri iyo baruwa, bashimiye Trump kuba yari yashyize umukono kuri iryo tegeko, ariko bamusaba kurishyira mu bikorwa ryose, uko riteganyijwe kandi nta gutinda.

Bagaragaje ko ibyo bihano bishobora kugira uruhare rukomeye mu guhatira Putin guha agaciro ibiganiro bigamije kugera ku mahoro muri Ukraine.

Banasabye ubutegetsi bwa Trump gushyira mu bikorwa ibihano biteganywa n'itegeko ryitiriwe Graham mu buryo busesuye, kugira ngo bigire ingaruka ku Burusiya no ku babufasha gukomeza kubona amafaranga binyuze mu bucuruzi bw'ingufu.

Icyemezo cya Trump cyo guhagarika ibihano bimwe cyafashwe mu gihe ubutegetsi bwe bukomeje kugaragaza ubushake bwo kugirana ibiganiro n'u Burusiya ku bibazo by'intambara yo muri Ukraine.

Mu cyumweru cyabanjirije iki, Trump yari yatangaje ko yagiranye ikiganiro kuri telefoni na Putin, bakumvikana ko Amerika izagura mazutu mu Burusiya.

Iyi gahunda yateje impaka mu banyapolitiki bo muri Amerika ndetse no mu bihugu biyishyigikiye, kubera impungenge z'uko amafaranga u Burusiya bwakura muri ubwo bucuruzi ashobora kubufasha gukomeza ibikorwa bya gisirikare muri Ukraine.

Perezida wa Ukraine, Volodymyr Zelensky, na we yanenze ayo masezerano, avuga ko ari impano kuri Putin kandi ko asa no “gushora imari mu ntambara igomba guhagarikwa”.

Zelensky kandi yagaragaje ko yumva yaragambaniwe na Trump, bitewe n'uko icyemezo cya Amerika gishobora kugabanya igitutu ku Burusiya mu gihe Ukraine ikomeje guhangana n'intambara yatangijwe n'icyo gihugu.

Ibi byemezo byombi, birimo gahunda yo kugura mazutu mu Burusiya no guhagarika ishyirwa mu bikorwa ry'ibihano bimwe, byongeye guteza impaka ku buryo ubutegetsi bwa Trump buzakoresha igitutu cy'ubukungu kugira ngo bushishikarize u Burusiya kwemera ibiganiro by'amahoro.

Nubwo abashyigikiye ibihano bagaragaza ko bishobora guhatira Putin guhindura imyitwarire, icyemezo cya Trump cyo kubihagarika bimwe cyerekana ko inyungu z'ubukungu n'iza politiki zo muri Amerika zikomeje kugira uruhare mu migambi yayo ku ntambara yo muri Ukraine.

Umubano w'u Bubiligi na RDC ukomeje kuzamba

Mahame — 2026-10-16T19:54:29Z

Ku wa 15 Ukwakira 2026, Umuyobozi w'ibiro bya Tshisekedi, Anthony Nkinzo Kamole, yasabye aba bakozi kwirinda mu buryo ubwo ari bwo bwose kuvugana n'abakora muri Ambasade y'u Bubiligi.

Nkinzo yamenyesheje aba bakozi ko mu gihe byaba ari ngombwa, itumanaho na Ambasade y'u Bubiligi rizajya rikorwa na Minisiteri y'Ububanyi n'Amahanga ya RDC kandi ko uzabirengaho azahanwa.

Mu kiganiro na Jeune Afrique cyabaye kuri uyu wa 16 Ukwakira, Minisitiri Prévot yatangaje ko yatunguwe n'iki cyemezo.

Minisitiri Prévot yagize ati: “Nta cyakumvikanisha iki cyemezo. Twakibonye kandi cyatubabaje cyane.”

Uyu muyobozi yagaragaje ko yifuza ko iki cyemezo cyamara igihe gito cyane, asobanura ko izindi nzira za dipolomasi zifunguye mu gihe u Bubiligi bwifuza umubano mwiza na RDC.

Nubwo impamvu y'iki cyemezo itasobanuwe, cyafashwe nyuma y'aho tariki ya 14 Ukwakira abashinzwe umutekano mu Bubiligi basatse ingo z'abo mu muryango wa Tshisekedi i Bruxelles, Flandre na Wallonie.

Iri saka ryakozwe mu gihe abo mu muryango wa Tshisekedi bari gukorwaho iperereza ku byaha by'iyezandonke no kunyereza amabuye y'agaciro yo mu Ntara ya Lualaba na Haut-Katanga.