Imirasire.rw

Nyamasheke: Abantu babiri bakekwaho gukomeretsa no kwiba umucuruzi batawe muri yombi

Mahame — 2026-07-25T17:26:04Z

Ibi byabereye mu Mudugudu wa Kabeza, Akagari ka Gasovu, Umurenge wa Karambi mu Karere ka Nyamasheke, mu ijoro ryo ku wa 24 Nyakanga 2026.

Amakuru ava aho byabereye agaragaza ko ahagana saa munani z'ijoro, abantu babiri bitwaje imihoro bateye urugo rwa Barutusanumwe Zacharie, usanzwe acuruza ingurube mu isoko rya Rugali, basanga aryamye mu nzu ye.

Ngo bamukubise imihoro, bamutema ku nkokora no ku bindi bice by'umubiri birimo urutugu, umusaya n'itako, mbere yo kumwambura igikapu cyari kirimo amafaranga arenga miliyoni 1 Frw yari yavanye ku isoko rya Rugali gucuruza ingurube.

Biravugwa ko Barutusanumwe yajyanye ayo mafaranga mu rugo kuko yavuye ku isoko bwije agasanga banki zamaze gufunga.

Sebahire Josue, umwe mu baturage bageze aho ubwo bujura bwitwaje intwaro bwabereye bwa mbere, yavuze ko basanze uwagabweho igitero yakomeretse bikomeye.

Yagize ati: "Twahageze saa munani n'igice dusanga bamutemye ku nkokora, ku rutugu, mu musaya no ku itako. Nyuma yo kumutema yarabyutse afata umuhoro wari mu nzu atangira kwitabara no guhangana na bo."

Nyuma y'ubwo bujura, abaturage bahise batabaza ubuyobozi bw'inzego z'ibanze n'inzego z'umutekano, banatangira gushakisha abakekwa bifashishije amakuru yatanzwe n'uwari wabukorewe, kuko ngo yari yamenye umwe mu bamuteye.

Umunyamabanga Nshingwabikorwa w'Umurenge wa Karambi, Hagenimana Narcisse, yavuze ko ubufatanye bw'abaturage n'inzego z'umutekano bwatumye abantu babiri bahita batabwa muri yombi, bashyikirizwa Sitasiyo ya Polisi ya Macuba kugira ngo bakurikiranwe.

Yashimiye abaturage bihutiye gutanga amakuru, abasaba gukomeza kugira uruhare mu kwicungira umutekano no gutanga amakuru ku gihe igihe babonye ibikorwa bishobora guhungabanya umutekano.

Ati: "Turashimira abaturage bagize uruhare mu gutanga amakuru yatumye aba bakekwa bafatwa. Turabasaba gukomeza gukorana n'inzego z'umutekano n'iz'ibanze kugira ngo ibyaha nk'ibi bikumirwe."

Hagenimana yanakanguriye abaturage gukoresha uburyo bw'ikoranabuhanga mu kubika no guhererekanya amafaranga (cashless), avuga ko ari bumwe mu buryo bwo kugabanya ibyaha byo kwambura abantu amafaranga babitse mu ngo.

Yagize ati: "Leta yashyize imbaraga mu gukoresha uburyo bwa cashless nka e-Kash n'ubundi buryo bw'ikoranabuhanga. Turakeka ko uru rugo rwatewe kubera ko abakekwa bari bazi ko nyirarwo yari afite amafaranga menshi mu rugo."

Barutusanumwe yahise ajyanwa ku Kigo Nderabuzima cya Karambi, ariko kubera uburemere bw'ibikomere yari afite yoherezwa ku Bitaro bya Kibogora, aho akomeje kwitabwaho n'abaganga.

Amakuru ava mu muryango we avuga ko hari gahunda yo kumwohereza ku Bitaro Bikuru bya Kaminuza bya Butare (CHUB) kugira ngo akomeze kuvurirwa ku rwego rwisumbuyeho.

Mu gihe iperereza rikomeje, abatawe muri yombi bakekwaho gukomeretsa no kwiba uwo mucuruzi bafungiye kuri Sitasiyo ya Polisi ya Macuba, aho bategereje gushikirizwa inzego z'ubutabera hakurikijwe amategeko.

Rusizi: Abagore bakubise mugenzi wabo bamuhora ko atambaye ikariso bimuviramo kujyanwa mu bitaro

Mahame — 2026-07-23T13:24:31Z

Amakuru avuga ko uyu mugore yari yagiye guhaha nk'ibisanzwe, ariko umwe mu bagore bacururizaga muri iryo soko atangira kumubwira amagambo amukoza isoni, amushinja ko atambaye umwambaro w'imbere.

Uyu mugore yavuze ko uwo mugore atabigarukirijeho gusa, ahubwo yakomeje kubivuga mu ruhame kugeza ubwo abandi bafanyije na we, bikarangira bamukubise ndetse bakamwambika ubusa imbere y'imbaga y'aabari muri iryo soko.

Yagize ati: "Nari nje guhaha maze kugura ibintu, uwo mpasanze arambwira ngo nagiye ntambaye ikariso. Yabivuze inshuro nyinshi, aransingira, bampuriraho banyambika ubusa. Icyo nsaba ni uko narenganurwa."

Nyuma yo gukubitwa no gukozwa isoni mu ruhame, uyu mugore yajyanywe mu bitaro kugira ngo ahabwe ubuvuzi.

Abagore bamwe bari muri iryo soko banenze bikomeye imyitwarire ya bagenzi babo, bavuga ko nta mpamvu n'imwe yagombaga gutuma bakubita no bakambika ubusa mugenzi wabo.

Umwe mu babyiboneye yavuze ko yasanze abantu bamaze kurwana, asobanura ko byasabye undi mugabo wari hafi kujya hagati kugira ngo abakiranure.

Yagize ati: "Uyu mubyeyi ni ihohoterwa bamukoreye. Umuntu uko yakwambara kose ni uburenganzira bwe."

Undi mugore yavuze ko bibabaje kubona ababyeyi bagenzi be bambika mugenzi wabo ubusa mu ruhame.

Ati: "Uyu mubyeyi bari kumurenganya. Kuba yari yambaye ipantalo aje guhaha ntabwo byari bikwiye gutuma bamwambura ubusa. Ni ikibazo gikomeye kandi kirababaje."

Ababonye ibyabaye basabye ko uyu mugore yahabwa ubutabera, mu gihe abashinjwa kumukubita no kumwambika ubusa banze kugira icyo batangaza ubwo basabwaga kugira icyo bavuga kuri ibi birego.

Ubuyobozi bw'Akarere ka Rusizi bwamaganye ibyo bikorwa, buvuga ko bidakwiriye umuco nyarwanda kandi ko amakimbirane akwiye gukemurwa binyuze mu biganiro aho kwihanira.

Umuyobozi w'Akarere ka Rusizi, Sindayiheba Phanuel, yagize ati: "Ntabwo ari iby'i Rwanda. Abanyarwanda babeshwaho no kubana no gusabana. Amakimbirane hagati y'abantu ntabwo wayarinda, ariko igihe habonetse icyo batumvikanaho habaho kuganira. Inama nkuru iruta izindi ni uko igihe cyose habonetse amakimbirane, hashakwa uko yakemurwa nta cyangiritse."

Nubwo umuco nyarwanda ushishikariza abantu kwambara bakikwiza, nta tegeko ryo mu Rwanda ritegeka umuntu kwambara ikariso cyangwa undi mwambaro w'imbere. Icyakora, amategeko ahana uwo ari we wese ukora ihohotera, gukubita cyangwa gukoza mugenzi we isoni mu ruhame, ibyo bikaba ari byo uyu mugore asaba ko yakorerwa akabona ubutabera.

REMA yasabye abantu kwirinda kujugunya aho babonye hose imyanda yakwangiza urusobe rw'ibinyabuzima byo mu mazi

Mahame — 2026-07-22T04:36:55Z

REMA yagaragaje ko igihe cy'impeshyi gituma amazi yo mu biyaga, inzuzi imigezi n'ibishanga agabanuka, bikaba bishobora gutuma umwanda winjiramo wangiza urusobe rw'ibinyabuzima bituyemo ndetse n'ubuzima bw'abaturage bayakoresha mu bikorwa bitandukanye bikaba bwahangirikira.

Mu butumwa bwatanzwe n'iki kigo kibinyujije ku mbuga nkoranyambaga zacyo, cyibukije Abanyarwanda n'abandi bose ko amazi ari umutungo kamere ukwiye kurindwa.

REMA yagaragajwe ko imyanda ijugunywa mu migezi, mu bishanga no muri za ruhurura ari imwe mu mpamvu zikomeye zituma amazi ahumana cyane, cyane cyane mu gihe cy'impeshyi.

REMA yagize iti: "Wari uzi ko mu mpeshyi amazi agabanuka bigatiza umurindi ihumana ryayo kandi bigashyira mu kaga urusobe rw'ibinyabuzima ruba mu mazi? Irinde kujugunya imyanda mu migezi, mu bishanga no muri za ruhurura. Kugira amazi meza bihera mu kunoza imicungire y'imyanda."

Iki kigo cyasobanuye ko kubungabunga amazi bidakorwa n'inzego za Leta gusa, ahubwo bisaba ubufatanye bw'abaturage bose binyuze mu gucunga neza imyanda, kuyitandukanya hakurikijwe ubwoko bwayo no kuyigeza ahabugenewe, aho kuyijugunya ahashobora kwanduza amazi.

REMA yasoje isaba buri Munyarwanda n'undi wese kugira uruhare rugaragara mu kurengera ibidukikije, ishimangira ko impinduka nziza zitangirira ku bikorwa bito bya buri munsi.

Iyi: "Gira icyo ukora uyu munsi urengere ibidukikije n'urusobe rw'ibinyabuzima."

Mu bundi butumwa bwayo, REMA yagaragaje ko umushinga wo gusubiranya ibishanga bitanu byo mu Mujyi wa Kigali ugeze ku musozo watangiye gutanga umusaruro ugaragara.

Yagize iti: "Mu gihe umushinga wo gusubiranya ibishanga mu Mujyi wa Kigali ugana ku musozo, ibi bishanga biri kugarura umwimerere wabyo. Kubisubiranya byatumye urusobe rw'ibinyabuzima rugaruka, bibyongerera ubushobozi bwo kubika amazi, kugabanya ibyago by'imyuzure no kongera ubwiza bw'Umujyi wa Kigali."

Ubu butumwa bwombi bwa REMA bugaragaza ko kurengera amazi n'urusobe rw'ibinyabuzima bisaba uruhare rwa buri wese, haba mu kwirinda guta imyanda yangiza ibidukikije no gushyigikira ibikorwa byo gusubiranya ibishanga n'ibindi bidukikije bifite uruhare rukomeye mu kubungabunga amazi, kugabanya imyuzure no gusigasira umutungo kamere ku nyungu z'ibisekuru by'ubu n'iby'ahazaza.

ORATOR 2026: Abanyeshuri 30 bahize abandi bahembwe itike yo kujya mu Bwongereza

Mahame — 2026-07-19T22:00:34Z

Aya marushanwa yasojwe kuri iki Cyumweru tariki ya 19 Nyakanga 2026 muri BK Arena, ahanatangiwe ibihembo ku bahize abandi mu irushanwa rya mbere rya ORATOR English Competition ritegurwa ku rwego rw'igihugu na Minisiteri y'Uburezi ku bufatanye n'umuryango iDebate Rwanda.

Ni igikorwa cyitabiriwe n'abayobozi batandukanye barimo Minisitiri w'Uburezi Joseph Nsengimana, Minisitiri w'Urubyiruko n'Iterambere ry'Ubuhanzi, Dr Utumatwishima Jean Nepo Abdallah, Umunyamabanga wa Leta muri Minisiteri y'Uburezi Claudette Irere, abayobozi b'ibigo by'amashuri, abafatanyabikorwa, abarimu, ababyeyi ndetse n'abanyeshuri barenga 1,000 bari baje gushyigikira bagenzi babo.

Umunyamabanga wa Leta muri Minisiteri y'Uburezi, Claudette Irere

Mu ijambo ry'ikaze, Umunyamabanga wa Leta muri Minisiteri y'Uburezi, Claudette Irere, yavuze ko ORATOR atari irushanwa risanzwe, ahubwo ari urubuga rwubaka icyizere, ubutwari n'ubushobozi bw'urubyiruko rw'u Rwanda bwo gutekereza no kuvuga rwisanzuye.

Yagaragaje ko abanyeshuri 120 bageze ku cyiciro cya nyuma, bangana na 60 bo mu cyiciro rusange na 60 bo mu cyiciro cya kabiri cy'amashuri yisumbuye, nyuma yo kunyura mu marushanwa yatangiriye ku mashuri, akomereza ku rwego rw'imirenge n'uturere.

Yavuze ko mu minsi ine bamaze muri "bootcamp" , aba banyeshuri batojwe uburyo bwo gutanga ibitekerezo neza, kuvugira mu ruhame no guteza imbere ubushobozi bwo gutekereza byimbitse.

Irere yavuze ko gahunda ya ORATOR ijyanye n'icyerekezo cy'u Rwanda cyo kubaka urubyiruko rufite ubushobozi bwo guhangana ku rwego mpuzamahanga.

Ati: "Icyongereza si isomo gusa, ni ururimi rwifashishwa mu myigire, ni igikoresho cy'ubuyobozi kandi ni irembo rifungura amahirwe menshi haba mu Rwanda no ku rwego mpuzamahanga. Ni yo mpamvu ORATOR ari gahunda ifite agaciro gakomeye."

Yakomeje ashishikariza abanyeshuri bose bitabiriye irushanwa gukomeza kugira icyizere cy'ijwi ryabo, agaragaza ko ibitekerezo byabo bifite agaciro kandi ko ari byo bizubakiraho ejo hazaza h'u Rwanda.

Minisitiri w'Uburezi, Joseph Nsengimana

Minisitiri w'Uburezi Joseph Nsengimana yavuze ko ORATOR ari gahunda yatangiye ikorerwa mu mashuri mbere yo kugera ku rwego rw'igihugu.

Yasobanuye ko mu banyeshuri 120 bageze ku cyiciro cya nyuma, hatoranyijwemo 30 bahize abandi, bakazahabwa amahirwe yo kujya mu Bwongereza mu rugendo rw'ibyumweru bibiri rugamije kubongerera ubumenyi mu Cyongereza.

Ati: "Uyu munsi twatangaje abana 30 batsinze, bahize abandi. Ni bo bazajya mu Bwongereza bakamara ibyumweru bibiri biga Icyongereza, hanyuma bagaruke ari intangarugero ku bandi banyeshuri."

Yongeyeho ko ORATOR itazarangirira ku marushanwa gusa, ahubwo buri shuri rizashyirwamo amakipe cyangwa amaclubs y'Icyongereza azafasha abanyeshuri gukomeza kwitoza, ku bufatanye n'umuryango iDebate Rwanda.

Nsengimana yavuze ko guteza imbere Icyongereza bifasha abanyeshuri kumva neza amasomo yose kuko ari rwo rurimi rwifashishwa mu myigire.

Minisitiri w'Urubyiruko n'Iterambere ry'ubuhanzi, Dr. Jean Nepo Abdallah Utumatwishima

Minisitiri w'Urubyiruko n'Iterambere ry'Ubuhanzi, Dr Utumatwishima Jean Nepo Abdallah, yashimangiye ko kwigisha urubyiruko kuvuga neza Icyongereza ari ukubategurira kuzitwara neza mu isi y'ubucuruzi n'ubuyobozi.

Yagize ati: "Iki gikorwa ni inyungu ku rubyiruko no ku bayobozi b'ahazaza. Kwigisha ururimi rw'ubucuruzi hakiri kare ni ishoramari rikomeye ku gihugu."

Mbonimpaye Jean de Dieu na Minisitiri w'Uburezi Joseph Nsengimana

Mbonimpaye Jean de Dieu wo muri ES Rusumo mu Karere ka Kirehe, wegukanye umwanya wa kabiri, yashimiye Minisiteri y'Uburezi, iDebate Rwanda n'abarimu ku mahugurwa n'ubufasha bahawe.

Yavuze ko ORATOR itabafashije gusa kuvuga neza Icyongereza, ahubwo yabigishije gutega amatwi abandi, kubaha ibitekerezo bitandukanye no gutekereza byimbitse.

Yanatanze ibyifuzo birimo kongera iminsi y'amahugurwa mbere y'amarushanwa, kongera ibyiciro by'irushanwa kugira ngo abanyeshuri babone ubunararibonye bwinshi, gushyiraho uburyo abakurikirana gahunda bakomeza gutoza abandi ndetse no kuyigeza mu bice byinshi by'icyaro kugira ngo abanyeshuri bose babone amahirwe angana.

Abatoni Keza Briella na Minisitiri w'Uburezi Joseph Nsengimana

Abatoni Keza Briella wo muri ENDP Karubanda mu Karere ka Huye, wegukanye umwanya wa mbere mu gihugu, yavuze ko mu ntangiriro yagize ubwoba no kwibaza niba azabishobora.

Yasobanuye ko amahugurwa baherewe muri "bootcamp" , inkunga y'abarimu, abakemurampaka n'abandi banyeshuri byamwongereye icyizere kugeza ageze ku ntsinzi.

Yashishikarije urubyiruko kudategereza guhatirwa kwiga Icyongereza, ahubwo rukarukunda kandi rukarukoresha buri munsi.

Ati: "Ntukemere ko amakosa yo kuvuga aguca intege. Mu rugendo rwose habamo inzitizi, ariko igikomeye si ukugwa, ahubwo ni ukubyuka ugakomeza. Iyo ukomeje, ugera aho ushaka kugera."

Iri rushanwa rya ORATOR ryitezweho kuzajya riba buri mwaka, rikazafasha abanyeshuri benshi guteza imbere ubushobozi bwo kuvuga Icyongereza, gutanga ibitekerezo byubaka no kwitegura guhangana ku rwego mpuzamahanga, mu rwego rwo gushyigikira intego z'u Rwanda zo kubaka uburezi bushingiye ku bushobozi n'ubumenyi bukenewe ku isoko ry'umurimo rihinduka buri gihe.

Iyo wemeye ko baguha, uba wigize ubusa - Perezida Kagame

Mahame — 2026-07-17T12:42:47Z

Ibi Perezida Kagame yabigarutseho kuri uyu wa 17 Nyakanga 2026, ubwo yayoboraga Inama ya Biro Politiki y'Umuryango FPR Inkotanyi yagarukaga ku cyerekezo cy'uyu muryango mu myaka 30 iri imbere.

Perezida Kagame yavuze ko amateka y'u Rwanda n'aya Afurika muri rusange agaragaza ko hari aho ibihugu byimakaje umuco wo gutegereza ibyo abandi babigeneye, ibintu yavuze ko bidakwiye gukomeza.

Yagize ati: "Twebwe kuki dutegereza ko abandi bashyira ku meza, maze tugafata ibyo batugeneye? Ibyo ni ukwigira ubusa. Iyo wemeye ko baguha, uba wigize ubusa."

Yasobanuye ko ubufatanye nyabwo hagati y'ibihugu cyangwa abantu bugomba gushingira ku kuba buri ruhande rugira icyo ruzana ku meza, aho kuba rumwe ruhora rutegereje gufashwa.

Ati: "Iyo ujya gufatanya n'abandi, ubanza ukumva ikikurimo ufite. Ni iki wowe utanga kugira ngo uhuze n'icyo undi atanga, mwese mubigiremo inyungu?"

Perezida Kagame yagaragaje ko imwe mu mbogamizi Afurika yagize ari ukwimakaza politiki yo guhora itegereje inkunga aho kubanza kubyaza umusaruro ubushobozi ifite.

Yavuze ko nubwo hari abaza gutanga ubufasha, bidakwiye kuba ishingiro ry'imibereho y'ibihugu cyangwa abaturage.

Ati: "Baraboneka, abo bagoboka baraza rwose, ariko ikibazanye ni imbabazi bagufitiye kubera iki? Kubera iki bagufitiye imbabazi? Kuki?"

Yakomeje agaragaza ko buri gihugu, kabone n'iyo cyaba ari gito nk'u Rwanda, gifite umutungo n'ubushobozi byakubakirwaho iterambere.

Ati: "Buri gihugu, buri bantu bafite icyo bafite. Gutegereza ko uwo ahandi azaza kubera ko azi icyo kugikoresha akagitwara, akazaza kuguha imfashanyo wari ukeneye, uba wigize ubusa."

Perezida Kagame yibukije ko ibibazo bikomeye u Rwanda rwanyuzemo byari kurugora kurushaho iyo rudahaguruka ngo rwikemurire ibibazo.

Yagize ati: "Ibibazo tumaze kunyuramo nk'u Rwanda mu mateka yacu... u Rwanda rudahagurutse ngo rugire icyo rwikorera, rwigezaho ubu muba muri ubusa."

Yasabye abanyamuryango ba FPR Inkotanyi n'Abanyarwanda muri rusange kudaha umwanya uwo ari wo wose umuco wo kwigira ubusa.

Ati: "Ntimukigire ubusa, ntimuzigire ubusa. Mukemera kuba ubusa? Mukemera ko mushobora kubaho, muzagira icyo mutunga, mukora ari uko umuntu yaje kubibakoresha cyangwa kubibakorera."

Perezida Kagame yafashe umwanya uhagije wo kuganiriza urubyiruko, arusaba gukoresha neza amahirwe rufite no kudategereza kuzicuza imyaka yarwo yarangiye.

Yavuze ko abakuze banyuze mu bihe byinshi kandi hari ibyo bifuza kuba barakoze kurushaho, asaba urubyiruko kudasubiza inyuma amahirwe rufite uyu munsi.

Yarubwiye ko rudakwiye kurangazwa n'ibigezweho cyangwa ibyo yise "vibes" , ahubwo rukubaka ubuzima bwarwo rushingiye ku ntego n'umusingi uhamye.

Yagaragaje ko urubyiruko rudakwiye kubaho ruhangayikishijwe gusa n'ibizaba ejo, ahubwo rugomba gukora ibikwiye uyu munsi kugira ngo ruzagere ku byo rwifuza.

Perezida Kagame yanibukije abanyamuryango ba FPR Inkotanyi ko umusaruro w'akazi kabo udapimirwa ku magambo bavuga, ahubwo upimirwa ku buzima bw'Abanyarwanda n'impinduka babagezaho.

Yavuze ko FPR ifite amateka n'indangagaciro biyisaba guhora ishyira imbere inyungu z'Abanyarwanda, buri wese akuzuza inshingano ze.

Ati: "Igihugu twifuza ubwo ni twe, ariko icyo wifuza ukigeraho ute? Inshingano zihera ku muntu zikarangirira kuri twese."

Perezida Kagame yavuze ko buri muyobozi akwiye kujya yibaza buri munsi niba ibyo akora bihindura imibereho y'Abanyarwanda nk'uko babibasezeranyije.

Yagize ati: "Buri wese buri gitondo uko uramutse ujye wibaza icyo kibazo. Wibaze aho tugeze mu bijyanye n'inshingano twahawe twese, ushake kumenya icyo Abanyarwanda ubwabo bavuga ku buzima bwabo n'aho twabasezeranyije kubageza."

Yasoje agaragaza ko umusaruro nyawo utabeshywa cyangwa ngo uhimbwe, kuko abaturage ari bo bagaragaza niba ibyo abayobozi bavuga bihura n'ibyo bakora.

Yatanze urugero rw'abana, avuga ko bidashoboka kuvuga ko biga neza kandi batiga, cyangwa ngo uvuge ko babayeho neza kandi imibereho yabo itabigaragaza.

Perezida Kagame yashimangiye ko ari yo mpamvu abayobozi bagomba guhora bibaza niba ibyo bakora bigirira akamaro Abanyarwanda, kuko ari bo gipimo nyakuri cy'iterambere igihugu kiba kigezeho.

Inzoka zifite akamaro gakomeye ku rusobe rw'ibinyabuzima nubwo inke muri zo zifite ubumara bwakwica umuntu

Mahame — 2026-07-16T16:10:07Z

Uyu munsi wihariye ku nzoka uyu mwaka ufite insanganyamatsiko igira iti “Celebrate. Respect. Protect”, bisobanuye ngo “Zishimire, uzubahe kandi uzirinde”, ikaba igaragaza ko inzoka zikwiye kurindwa nk'ibindi binyabuzima bifite uruhare mu rusobe rw'ibidukikije.

Nubwo abantu benshi batinya inzoka kubera ko hari inke muri zo zifite ubumara bushobora kwica umuntu, abahanga mu bidukikije bagaragaza ko umubare munini w'inzoka utagira ubwo bumara kandi ko izi nyamaswa zose muri rusange zifite akamaro gakomeye ku buzima bw'Isi.

Inzoka ni zimwe mu nyamaswa zigira uruhare mu kurinda uburinganire bw'urusobe rw'ibinyabuzima, kuko zifasha kugabanya ubwiyongere bukabije bw'umubare w'izindi nyamaswa, cyane cyane imbeba n'ibindi byonnyi bishobora kwangiza imyaka cyangwa gukwirakwiza indwara.

Iyo inzoka zigabanyije umubare w'imbeba n'ibindi byonnyi, bifasha abahinzi kurinda imyaka yabo no kubungabunga umusaruro ukomoka ku buhinzi. Ni uruhare rukomeye kuko iyo izo nyamaswa ziyongeriye cyane zishobora guteza ibibazo ku bantu no ku bidukikije.

Mu ruhererekane rw'ibiribwa, inzoka nazo zifite umwanya w'ingenzi kuko hari izihiga izindi nyamaswa, ndetse na zo zikaba ibiribwa by'izindi nyamaswa nka zimwe mu nyoni n'inyamaswa z'ishyamba. Ibi bituma zigira uruhare mu kubungabunga imiterere karemano y'urusobe rw'ibinyabuzima.

Nubwo hari inzoka zifite ubumara bukomeye bushobora guteza ibyago ku muntu, abahanga bavuga ko ari igice gito cyane cy'ubwoko bw'inzoka buboneka ku Isi, ahubwo inzoka nyinshi zibaho zidateje ikibazo ku bantu iyo zidasagarariwe cyangwa ngo ziterwe.

Uretse uruhare rwazo mu bidukikije, inzoka zinifashishwa mu iterambere ry'ubuvuzi. Ubumara bw'inzoka zimwe na zimwe bwifashishwa mu bushakashatsi bugamije gukora imiti no kuvura indwara zitandukanye, bitewe n'ubushobozi bw'ibinyabutabire buboneka muri ubwo bumara.

Abashinzwe kubungabunga ibidukikije basaba abantu kwirinda kwica inzoka uko babonye, ahubwo bakazubaha kandi bakazireka zikagira uruhare rwazo mu bidukikije. Bavuga ko iyo umuntu ahuye n'inzoka, asabwa kuyigendera kure, kutayitera amabuye cyangwa ikindi kintu cyose no gusaba ubufasha abafite ubumenyi mu bijyanye no kwita ku nyamanswa mu gihe bikenewe.

Ubutumwa bw'Umunsi Mpuzamahanga wahariwe Inzoka bwibutsa abantu ko kuba hari inzoka zifite ubumara bitagomba gutuma bazifata zose nk'umwanzi wabo, ahubwo bakwiye kumenya neza uruhare rwazo, bakuzitaho kuko ari ingenzi mu kurinda urusobe rw'ibinyabuzima no kubungabunga ubuzima bw'umubumbe dutuyeho.

Bagaragaza ko kurinda inzoka ni ukurinda n'ibindi binyabuzima byinshi, kuko buri kiremwa gifite uruhare mu kubaka urusobe rw'ibinyabuzima rukora neza.

U Rwanda rukomeje kuza ku isonga muri Afurika mu kurwanya ruswa

Mahame — 2026-07-16T12:08:06Z

Ibyavuye mu isuzuma ry'ibanze rya Ibrahim Index of African Governance (IIAG) 2026, ryashyizwe ahagaragara muri Nyakanga 2026, rigaragaza ko u Rwanda rwabonye amanota 76,6% mu bipimo by'imikorere yo kurwanya ruswa mu mwaka wa 2025, runganya na Seychelles.

Iyi raporo isuzuma uburyo ibihugu bya Afurika bihagaze mu kurwanya ruswa hifashishijwe ibipimo bitandatu birimo ingamba zo kuyikumira, urugero rwa ruswa mu bigo bya Leta, uko inzego za Leta zose zigaragaramo cyangwa zitagaragaramo ruswa, uko urwego rw'abikorera ruhagaze, uburyo amasoko ya Leta atangwa mu mucyo, ndetse n'uko abaturage babona ibikorwa byo kurwanya ruswa.

Raporo igaragaza ko hagati ya 2016 na 2025, amanota y'u Rwanda yazamutseho 2,6%, bituma rukomeza kuba igihugu cya mbere muri Afurika mu kurwanya ruswa kuva mu 2016.

Nubwo bimeze bityo, abakoze ubu bushakashatsi bagaragaza ko umuvuduko w'iterambere muri uru rwego wagabanutse kuva mu 2021, n'ubwo amanota akomeje kwiyongera.

Mu gihe u Rwanda rwakomeje kugumana umwanya wa mbere, Seychelles ni cyo gihugu cyagaragaje umuvuduko munini kurusha ibindi mu myaka icumi ishize, aho amanota yacyo yazamutseho 26,3%, bituma kizamuka imyanya 12 ku rutonde rwa Afurika.

Ibindi bihugu byagaragaye mu icumi bya mbere harimo Ibirwa bya Maurice bifite amanota 65,7%, Sénégal ifite 64%, Bénin ifite 58,7%, Botswana ifite 57,8%, Namibia ifite 57,6%, Cape Vert ifite 56,1%, Tunisie ifite 55,9% na Burkina Faso ifite 55,6%.

Ku rwego rw'umugabane wa Afurika, raporo igaragaza ko ibikorwa byo kurwanya ruswa byateye imbere buhoro. Impuzandengo y'amanota yavuye kuri 38,6% mu 2016 igera kuri 39,1% mu 2025.

Icyakora, iri zamuka ntiryageze ku bihugu byose mu buryo bungana. Raporo igaragaza ko mu myaka icumi ishize amanota y'ibihugu 28 yagabanutse, mu gihe ay'ibihugu 26 yiyongereye, bigaragaza ko urugamba rwo kurwanya ruswa rukiri rufite imbogamizi mu bice bitandukanye by'umugabane.

Raporo inagaragaza ikinyuranyo kinini hagati y'ibihugu bihagaze neza n'ibifite amanota make. Mu gihe u Rwanda na Seychelles bihagaze ku mwanya wa mbere bifite amanota 76,6%, Sudani y'Epfo iza ku mwanya wa nyuma n'amanota 6,9% gusa.

Mo Ibrahim Foundation ivuga ko aya manota ashingiye ku makuru yakusanyijwe aturutse mu nzego zitandukanye, agasesengurwa hifashishijwe ibipimo bitandatu bikoreshwa muri gahunda ya Ibrahim Index of African Governance (IIAG). Raporo ya 2026 yashyizwe hanze ni iy'ibanze, ikaba yarabanje gukorerwa igenzura ry'imbere muri uwo muryango mbere yo gusohoka ku mugaragaro.

Perezida Kagame yashyizeho abanyamabanga bahoraho bashya muri Minisiteri ya Siporo n'iy'Urubyiruko

Mahame — 2026-07-15T17:05:00Z

Bikubiye mu itangazo ryashyizwe hanze n'Ibiro bya Minisitiri w'Intebe kuri uyu wa 15 Nyakanga 2026.

Ngabo Brave Olivier wahawe inshingano muri Minisiteri ya Siporo yari asanzwe ari Umunyamabanga Uhoraho muri Ministeri y'Urubyiruko n'Iterambere ry'Ubuhanzi.

Ni inshingano yari yahawe mu 2024. Icyo gihe yari avuye mu mwanya w'Umunyamabanga nshingwabikorwa w'Inama y'Igihugu y'Urubyiruko.

Ngabo yasimbuye Candy Basomingera wari wagiye muri izi nshingano zo muri Nyakanga 2025, asimbuye Uwayezu Jean François Regis. Basomingera yageze muri Minisiteri ya Siporo avuye ku mwanya w'Umuyobozi Mukuru Wungirije w'Ikigo cy'Igihugu gishinzwe guteza imbere ubukerarugendo bushingiye ku nama (RCB). Ni umwanya yagiyeho muri Werurwe 2023.

Ngabo yasimbuwe na Ishungure Parfait nk'Umunyambanga Uhoraho muri Ministeri y'Urubyiruko n'Iterambere ry'Ubuhanzi.

Ngabo ni na we washinze Your Well-Being Centre, umuryango wita ku bikorwa bitandukanye bigamije guteza imbere ubuzima bwiza bwo mu mutwe no ku mubiri.

Ngabo afite Impamyabumenyi y'Ikirenga mu miyoborere (Doctorate in Management Studies: DMS) yakuye muri Kazian School of Management mu Buhinde ndetse n'impamyabumenyi y'icyiciro cya gatatu cya kaminuza mu bijyanye na n'iyamamazabikorwa yakuye muri Rome Business School mu Butaliyani.

Afite uburambe bw'imyaka isaga 18 mu mirimo y'ubuyobozi mu nzego zitandukanye, zirimo itumanaho yakoreye muri MTN Rwanda, Airtel Rwanda na Korea Telecom Rwanda Networks, amabanki nka Banki ya Kigali mu bwingingizi nka Old Mutual Insurance ndetse n'imiryango itari iya Leta nka IBUKA Rwanda.

Muri izi nshingano, yakunze gukora nk'umuyobozi ushinzwe iyamamazabikorwa n'umuyobozi ushinzwe gahunda z'ibyo bigo.

Ishungure wagizwe Umunyamabanga Uhoraho muri Minisiteri y'Urubyiruko n'Iterambere ry'Ubuhanzi, yakoraga muri Minisiteri y'Ububanyi n'Amahanga n'Ubutwererane y'u Rwanda kuva muri Nzeri 2019 kugeza ubu.

Muri Minaffet yari Umuyobozi w'agateganyo ushinzwe Uburasirazuba bwo Hagati na Pasifika kuva mu Ugushyingo 2025 - kugeza ubu

Kuva muri Gicurasi 2021 – Ugushyingo 2025 yagarariye u Rwanda mu Muryango w'Ibihugu bikoresha Igifaransa (OIF).

Yabaye Umukozi Mukuru ushinzwe Ibikorwa by'Umuryango w'Abibumbye n'Imiryango Mpuzamahanga kuva muri Gicurasi 2021 – Ugushyingo 2025 naho kuva muri Nzeri 2019-Mata 2021 aba Umukozi Mukuru ushinzwe Ibikorwa bya Afurika y'Amajyaruguru.

Ishungure yakoreye Agence Universitaire de la Francophonie (AUF) nk'Umuyobozi ushinzwe Imishinga n'Itumanaho mu Karere ka Afurika y'Amajyaruguru (Maroc, Tunisia na Algeria) kuva muri Gicurasi 2017 kugeza muri Kanama 2019, aba i Rabat muri Maroc.

Yakoreye Ikigo gitanga ubujyanama cya DSID GROUP nk'umuyobozi ushinzwe imishinga n'umuhanga mu by'itumanaho kuva muri Gicurasi 2013 kugeza muri Mata 2017 aba i Rabat muri Maroc.

Yakoreye Huawei Technologies Morocco nk'umuhanga mu by'ikoranabuhanga kuva muri Mutarama kugeza Ukuboza 2012 aba i Rabat muri Maroc.

Ishungure yaranaminuje, kuko afite impamyabumenyi mpuzamahanga mu buyobozi yabonye mu 2024 muri Institut National du Service Public iba i Strasbourg mu Bufaransa.

Afite impamyabumenyi y'icyiciro cya kabiri mu bya politiki yabonye mu 2024 ayikuye muri muri Université Paris 1 Panthéon-Sorbonne y'i Paris mu Bufaransa.

Hari indi mpamyabumenyi y'icyiciro cya Kabiri y'ibijyanye n'amategeko mpuzamahanga y'uburenganzira bwa muntu yabonye mu 2021 ayikuye muri Nantes University yo mu Bufaransa.

Afite kandi impamyabumenyi mu Itumanaho (Diplôme d'Ingénieur d'État en Télécommunications) yabonye mu 2012 ayikuye muri Institut National des Postes et Télécommunications y'i Rabat muri Maroc.

Yize amasomo ajyanye n'Ibinyabuzima, Ubutabire n'Ikilatini kuva mu 2000-2006 asoreje mu Iseminari Nto ya Nkumba (Saint Jean) mu Karere ka Burera.

Abanyeshuri bo mu mashuri yisumbuye basaga ibihumbi 258 bagiye gukora ibizamini bya Leta bisoza umwaka

Mahame — 2026-07-14T10:27:40Z

Ibi byatangajwe na Minisiteri y'Uburezi (MINEDUC) ibinyujije mu Kigo cy'Igihugu gishinzwe Ibizamini n'Ubugenzuzi bw'Amashuri (NESA), mu itangazo rigenewe abanyamakuru ryashyizwe ahagaragara kuri uyu wa 14 Nyakanga 2026, rigaragaza ko imyiteguro yose yarangiye kugira ngo ibizamini bikorwe neza kandi mu mucyo.

Nk'uko NESA yabitangaje, abakandida bazakorera ibizamini mu bigo 1,746 byateguwe gukorerwaho ibizamini hirya no hino mu gihugu.

Muri abo banyeshuri, 149,533 ni abo mu cyiciro rusange cy'amashuri yisumbuye (O-Level), mu gihe 108,722 ari abo mu cyiciro cya kabiri cy'amashuri yisumbuye (A-Level).

NESA yavuze kandi ko mu bakandida bose biyandikishije harimo 879 bafite ubumuga, bakazahabwa ubufasha n'ibyangombwa byihariye bizaborohereza gukora ibizamini mu buryo bungana n'ubw'abandi banyeshuri.

NESA yagaragaje ko izo ngamba zigamije guteza imbere uburezi budaheza no guha buri munyeshuri amahirwe angana yo gukora ibizamini no kugaragaza ubushobozi bwe.

Ibizamini bya Leta bisoza amashuri yisumbuye bifatwa nk'intambwe ikomeye mu rugendo rw'uburezi, kuko ari byo bigena abazakomereza mu mashuri makuru na za kaminuza ndetse n'abazahitamo andi masomo cyangwa kwinjira ku isoko ry'umurimo.

NESA yasabye abakandida bose kubahiriza amabwiriza agenga ibizamini, kwirinda uburiganya no kugera ku masite y'ibizamini ku gihe, kugira ngo iki gikorwa kigende neza kandi kirangwe n'umutuzo, ubunyangamugayo n'umucyo.

Ni yo mpamvu ibijyanye n'amakuru mu buzima tubiha agaciro cyane - Minisitiri Dr. Sabin Nsanzimana

Mahame — 2026-07-13T14:28:50Z

Ibi Dr Nzanzimana yabigarutseho kuri uyu wa 13 Nyakanga 2026, mu nama y'impuguke 35 ziturutse mu bihugu birindwi bya Afurika iteraniye mu Rwanda, mu mahugurwa y'ibyumweru bibiri agamije gusangizanya ubunararibonye ku ikoreshwa ry'amakuru y'ubuzima n'ubwenge buhangano (AI), yateguwe na Minisiteri y'Ubuzima ibinyujije muri NHIC ku bufatanye n'Ikigo Nyafurika gishinzwe Ubusesenguzi bw'Amakuru y'Ubuzima (HICA).

Minisitiri w'Ubuzima Dr. Sabin Nsanzimana

Dr. Sabin Nsanzimana yavuze ko mu rwego rw'ubuzima amakuru ari ingenzi nk'umuti, kuko iyo adahari cyangwa adakoreshwa neza, bigora inzego z'ubuvuzi gufata ibyemezo bikwiye.

Yagize ati: “Mu bintu by'ubuzima, iyo utazi iby'indwara aho izava, utazi urwaye, icyo arwaye, uba usa nk'ufite amaso afunze. Ni yo mpamvu ibijyanye n'amakuru mu buzima tubiha agaciro cyane. Ni ho uvurira umurwayi, ni ho azagaruka ukamenya ibyo wamuvuye ubushize. Noneho iyo uyahurije hamwe nk'Igihugu cyose, nko muri NHIC, hakusanyirizwa amakuru yose, ushobora kwicara muri icyo cyumba ukahava, umenye amakuru y'Igihugu cyose mu buzima.”

Yakomeje avuga ko ubu igihugu gishobora gukurikirana amakuru y'ubuzima mu gihe nyacyo, birimo umubare w'abana bavuka, abafite umuriro mwinshi, abagore bagira ibibazo mu gihe cyo kubyara ndetse n'ahashobora kuvuka icyorezo.

Ati: “Abagize umuriro mwinshi, abana bavutse, bavukanye ibiro bingahe, abagize ibibazo babyara, ahantu hashobora kuva icyorezo. Ibyo byose dusigaye tubibonera mu cyumba kimwe. Mbere byasabaga kubanza gukoresha inama, ugahamagara, rimwe na rimwe ugasanga kugera mu bice byose bidashoboka, ntubone amakuru yizewe. Nibyo rero igihugu cyashizemo imbaraga, ni ibintu bikorwa mu gihe cy'imyaka myinshi, ariko byaje gukunda mu mwaka ushize.”

Ikigo cya NHIC cyatangijwe ku mugaragaro muri Mata 2025, gifite inshingano zo guhuza amakuru ava ku bajyanama b'ubuzima, amavuriro, ibigo nderabuzima, ibitaro by'Uturere n'ibitaro bikuru, kikayasesengura mu gihe nyacyo kugira ngo afashe abafata ibyemezo.

Mu bikorwa byacyo, iki kigo gifasha gutahura hakiri kare ibyorezo, kugenzura ikoreshwa ry'ibikoresho by'ubuvuzi, gutegura igenamigambi rishingiye ku makuru ndetse no gukoresha ubwenge buhangano mu kugaragaza uko indwara cyangwa ibibazo by'ubuzima bishobora kwitwara mu gihe kiri imbere.

Umuyobozi Mukuru wa NHIC, Dr. Eric Remera, yavuze ko kimwe mu byagezweho ari uguhuza amakuru yose y'ubuzima ahantu hamwe, bikuraho ikibazo cyari gihari cyo kuba sisiteme zitandukanye zidakorana.

Yagize ati: “Amakuru wasangaga adakoreshwa neza kuko sisiteme zidakorana, ugasanga no kuyashyira hamwe biragorana. Ariko ubu kuba biri hamwe biroroshye kuyakoresha, ku buryo muri uyu mwaka ushize hari byinshi byagezweho. Haba gukora ubusesenguzi butandukanye muri porogaramu zitandukanye, nko ku mpfu z'abagore.”

Yanagaragaje ko ubu amakuru ashobora kuboneka buri munsi aho gutegereza raporo z'umwaka nk'uko byakorwaga mbere.

Ati: “Uyu munsi tuzi igipimo tugezeho dukoresheje amakuru tubona umunsi ku wundi. Mu gihe cyera twategerezaga kubona raporo za buri mwaka, ariko ubu umunsi ku wundi dushobora kubona abantu bapfuye cyangwa abagize indi ndwara runaka. Intego yindi ihari ni ugukoresha ikoranabuhanga na inovasiyo kugira ngo dufashe ubuvuzi.”

NHIC yatangiye no gukoresha ubwenge buhangano muri serivisi za Virtual Hospital, aho sisiteme ishobora gutahura abarwayi bafite ibyago byo kuremba, bakitabwaho hakiri kare mbere y'uko uburwayi bukomera.

Impuguke zasuye u Rwanda zanasobanuriwe uburyo igihugu gikurikirana imbangukiragutabara hifashishijwe ikoranabuhanga, ndetse n'uburyo amakuru ava ku bajyanama b'ubuzima ahuzwa n'ava mu bigo nderabuzima n'ibitaro, bigafasha kubona ishusho imwe y'ubuzima bw'abaturage.

Masoud Mohamed ukorera Minisiteri y'Ubuzima ya Ethiopia mu ishami rishinzwe imibare n'amakuru y'ubuzima, yavuze ko nubwo igihugu cye kimaze igihe gishora imari mu ikoranabuhanga ryifashishwa mu rwego rw'ubuzima, kigihura n'imbogamizi zo guhuza amakuru ava mu bigo byinshi.

Yagize ati: “Nubwo tumaze igihe dushora imari mu kunoza ireme ry'amakuru, turacyafite ibibazo birimo kuba amakuru akiri mu buryo butatanye ku mbuga zitandukanye, ikibazo cy'ireme ry'amakuru ndetse n'imbogamizi z'ibikorwa remezo bitewe n'ubunini bw'igihugu cyacu. Dufite Poste de Sante zirenga 17.000, ibigo nderabuzima birenga 3.000 ndetse n'ibitaro birenga 400, guhuza amakuru y'ibyo bigo byose bikaba bisaba ubushobozi n'ibikorwa remezo bihagije.”

Izi mpuguke zaturutse mu bihugu bya Burkina Faso, Ethiopia, Liberia, Senegal, Sierra Leone, Togo na Zambia, aho biteganyijwe ko ubumenyi bazungurana n'u Rwanda buzafasha ibihugu bya Afurika kongera ubushobozi mu gukoresha amakuru y'ubuzima, ikoranabuhanga n'ubwenge buhangano mu guteza imbere serivisi z'ubuvuzi no gufata ibyemezo bishingiye ku bimenyetso bifatika.