Imirasire.rw

Gicumbi/Rutare: Barasaba kubakirwa inzu ndangamurage igaragaza amateka y'Abami bahatabarijwe

Mahame — 2026-03-26T11:15:39Z

Aba baturage bavuga ko mu gihe hatakubakwa cyangwa ngo hashyirweho ibimenyetso bigaragaza amateka y'abami 6 n'abagabekazi 4, batabarijwe kuri uyu musozi byazatera ingaruka mbi zo gutuma amateka meza yaranze abami bayoboye igihugu cy'u Rwanda azimangatana.

Muyombano Pierre Calestin, umuturage wo i Rutare, avuga ko uyu musozi wagiye ubamo amateka yihariye kuva kera, aho hashyingurwaga abami n'abagebekazi bagera ku 10.

Agira ati: “Iwacu ni i Rutare, kuva mu mwaka wa 1740. Hano hari imisezero y'Abami n'Abagebekazi, abami ni 6 n'abagebekazi 4. Ni kwa Kigeri Rwabugiri aho tugihagaze ubu. Gusa hari ibindi bimenyetso by'amateka byarasenyutse, nta kintu gihari kiranga ayo mateka, kandi turifuza ko nibura hashyirwaho ikimenyetso kigaragaza aho abo bami batabarijwe, cyangwa se igiti kibigaragaza. Ni ingenzi kugira ngo amateka yacu ntazasibangana kandi abana bacu bazabashe kuyamenya.”

Yongeyeho ko kubaka aho hazajya habikwa amateka, nko mu buryo bw'inzu ndangamurage, byafasha gukomeza gusigasira amateka y'u Rwanda, kandi bikagira akamaro ku bukerarugendo.

Ati: “Nibura hagiye hubakwa inzu ndangamurage izajya ibika amateka y'Abami n'Abagebekazi batabarijwe i Rutare, aho abashaka kumenya amateka bazajya basura, bakamenya ibyabaye. Ibi bizafasha urubyiruko gusobanukirwa amateka y'igihugu, kandi n'abakireba hanze bazajya bamenya umuco n'amateka yacu. N'ubwo ubu hatari amahoteri cyangwa amazu y'abashyitsi, iterambere riraza, kandi ibikorwa byo gushora imari mu bukerarugendo bizakurikiraho.”

Hon. Bizimana Jean Baptiste, wahoze ari umwe mu bagize umutwe wa Sena mu Nteko Ishinga Amategeko y'u Rwanda, avuga ko amateka ya Rutare ari ingenzi cyane ku gihugu kandi agomba kurindwa no kumenyekanisha, aho yagarutse ku byo yakoze ari umuyobozi mu cyahoze ari Komine Rutare, ahashyira ikimenyetso ku musezera w'Umwami Kigeri IV Rwabugiri.

Ati: “Kuriya ni igikorwa twatekereje igihe kirekire. Amateka twari dusanzwe tuyazi, amwe twasomye, ayandi tuyabwirwaga n'ababyeyi bacu. Hari igihe ingoma yashakaga kuyasiba, abantu bakayubaha kandi batinyaga kuhahinga. Noneho ubu biragaragara ko hari ibyahungabanyijwe, n'ubwo hari aho usanga hasigaye igiti kimwe cyangwa ibimenyetso bike. Twifuza ko ibi bimenyetso byasubirwaho, haba mu buryo bw'ikoranabuhanga cyangwa igipande cy'icyapa kigaragaza amateka y'Abami n'Abagebekazi, kugira ngo abazasura Rutare bamenye amateka nyayo.”

Yongeyeho ko kubaka inzu ndangamurage igaragaza amateka y'abami batabarijwe mu musozi wa Rutare, bizafasha gukurura ba mukerarugendo bifuza kumenya amateka y'u Rwanda, bikazanira abaturage amahirwe y'akazi n'amafaranga.

Ati: “Iyo urebye mu mahanga, usanga barasigasira ibimenyetso by'amateka yabo, aho abami babo batabarizwa, kandi babikora ku buryo buhoraho. Natwe ni ngombwa ko dushyira mu bikorwa iki gitekerezo, kugira ngo urubyiruko rwacu, abuzukuru n'abanyarwanda b'ahazaza bazabashe kumenya amateka y'ahantu hatandukanye, by'umwihariko i Rutare.”

NZABONIMPA Emmanuel, Umuyobozi w'Akarere ka Gicumbi, yashimye igitekerezo cyo kubaka museum no guteza imbere ubukerarugendo bushingiye ku mateka y'Abami n'Abagebekazi batabarijwe i Rutare.

Agira ati: “Iyo turebye ku mahirwe dufite mu Karere ka Gicumbi, harimo n'ahantu hatabarijwe abami n'abagebekazi i Rutare. Iki ni igice cyihariye gishobora gushorwamo imari mu bukerarugendo. Nitumara gutunganya iyi site, abashaka kumenya amateka bazahasura, bikazazana amahirwe ku baturage. Twiteguye kandi gushyiraho ibikorwaremezo birimo imihanda myiza izagera aho, kugira ngo abashyitsi bagera i Rutare babashe kugera mu buryo bworoshye kandi batezwe imbere n'ubukerarugendo.”

Yongeyeho ko guteza imbere site nk'iyi bizafasha Rutare kumenyekana nk'igice cyunganira umujyi wa Byumba mu bukerarugendo, kandi hakazashyirwaho imihanda, amahoteri, n'ibindi bikorwaremezo bifasha abakunzi b'amateka kugera ku hantu habereye, bityo bikazazana inyungu ku baturage no ku karere muri rusange.

Rutare ni umusozi ubitse amateka akomeye y'abami bayoboye u Rwanda, cyane ko ari ho hatabarizwaha abami bitwa ba Mutara, abitwa ba Kigeri n'abitwa ba Cyirima, hakaba haratabarijwe Abami 6 n'abagebekazi 4, bose hamwe bakaba ari 10. Abami ni Kigeri I Mukobanya, Kigeri II Nyamuheshera, Kigeri III Ndabarasa, Kigeri IV Rwabugiri, Mutara I Semugeshi na Mutara II Rwogera. Naho abagabekazi ni Nyirakigeri Nyanguge, Nyirayuhi, Nyirakigeri Rwesero na Nyiramibambwe Nyiratamba.

Abaturage n'abayobozi bahuriza ku ngingo imwe ko gushyiraho inzu ndangamurage no guteza imbere ubukerarugendo bw'amateka ari uburyo bwo kwigisha urubyiruko, kubungabunga amateka y'igihugu, no kuzana iterambere rirambye ku baturage bo mu Murenge wa Rutare, Akarere ka Gicumbi ndetse n'iguhugu muri rusange.

RCHA isanga Abanyarwanda bakwiye guterwa ishema no gukoresha neza ururimi rw'Ikinyarwanda

Mahame — 2026-02-20T19:06:23Z

RCHA igaragaza ko ururimi kavukire ari rwo rufasha abantu gusobanukirwa neza amateka yabo, umuco wabo n'indangagaciro z'Igihugu, bityo kurusigasira no kurukoresha mu buryo bunoze ari inshingano za buri Munyarwanda, cyane cyane mu gihe isi igenda irushaho gukoresha indimi z'amahanga.

RCHA kandi ishimangira ko gukoresha neza Ikinyarwanda mu mashuri, mu itangazamakuru, mu nzego z'imirimo no mu buzima bwa buri munsi bizafasha mu guteza imbere ubumenyi, kubungabunga umuco no gusigasira ubumwe bw'Abanyarwanda.

Uyu munsi Mpuzamahanga w'Ururimi Kavukire uzizihizwa ku nsanganyamatsiko igira iti: “Dukoreshe, tunoze Ikinyarwanda hose”, igamije gushishikariza Abanyarwanda gukoresha neza ururimi rwabo mu nzego zose z'ubuzima, haba mu burezi, mu itangazamakuru, mu kazi no mu buzima bwa buri munsi.

Ibikorwa byo kwizihiza uyu munsi bizabera mu Mujyi wa Kigali, mu cyumba cy'Inama cy'Umujyi, ndetse no mu Karere ka Nyanza District ku Ishuri rya Koleji ya Kirisitu Umwami.

Aha hombi hazahuzwa hifashishijwe ikoranabuhanga muri gahunda ya YouthConnekt Hangout.

Mu rwego rwo kwizihiza uyu munsi, hateguwe ibikorwa bitandukanye birimo ibiganiro n'Abanyarwanda baba mu mahanga bizitabirwa imbonankubone, hagamijwe gukomeza kubahuza n'umuco n'ururimi rwabo.

Hateganyijwe kandi amahugurwa ku Kinyarwanda n'Umuco agenewe abana n'urubyiruko bo mu Ishuri Umuco ry'i Liège, azaba kuva tariki 18 kugeza ku ya 25 Gashyantare 2026. Ni igikorwa kigamije gufasha abana b'Abanyarwanda baba mu mahanga gukomeza kumenya no kunoza Ikinyarwanda.

Hazaba kandi amahugurwa y'abanyamakuru n'abashinzwe itumanaho mu bigo bitandukanye ku mikoreshereze iboneye y'Ikinyarwanda, ateganyijwe kuva tariki ya 25 kugeza ku ya 26 Werurwe 2026, hagamijwe kunoza imvugo n'imyandikire ikoreshwa mu itangazamakuru no mu bigo bya Leta n'ibyigenga.

Byongeye kandi, ku wa 19 Werurwe 2026 hateganyijwe inama nyunguranabitekerezo izamurikirwamo inkoranya y'amuga y'ikoranabuhanga mu Kinyarwanda, igamije guteza imbere ikoreshwa ry'ururimi rwacu mu bijyanye n'ikoranabuhanga rigezweho.

Inteko Nyarwanda y'Ururimi n'Umuco (RCHA) isaba Abanyarwanda bose gukomeza guterwa ishema no gukoresha neza Ikinyarwanda no kugisigasira, kugira ngo kizabe umurage ukomeza guhererekanywa mu bisekuru bizaza.

Ubutumwa bw'uyu munsi bushimangira ko umuco dusangiye ari wo uturanga, kandi ururimi rwacu rukaduhuza, bityo buri Munyarwanda agomba kugira uruhare mu kururinda no kuruteza imbere.

Ab'i Huro ahaturukaga imbuto zo kwizihiza Umuganura barasaba ibikorwa remezo byakurura abakererugendo

Mahame — 2025-07-31T22:21:24Z

Ibi ni ibyagarutsweho kuri uyu wa 31 Nyakanga 2025, ubwo Inteko y'Umuco, ubuyobozi bw'inzego z'ibanze n'abandi barimo n'itsinda ry'abanyamakuru basuye aka gace ka Huro ahari Ivubiro, mu rwego rwo kugera ahari amateka yihariye y'Umuganura mu Rwanda.

Aba baturege bagargaza ko bakeneye ibikorwa remezo birimo umuhanda ndetse n'inzu ndangamurage yashyirwa ahari Ivubiro, ibi ngo byabafasha kureshya ba mukerarugendo baza ku gicumbi cy'amateka y'Umuganura mu Rwanda, bikabasigira amadevize.

Mudahinyuka Pahulini

Uyu ni Mudahinyuka Pahulini, agira ati: “Hano i Huro kuva kera ni ho hari igicumbi cy'Umuganura,… iri vubiro ryagiyeho kugira ngo bajye bapima igihe barebe ko igihe cyo kubiba kigeze… rero icyo dusaba Leta ni uko yadufasha ikaba yashyira nk'aha hantu inzu cyangwa inyubako igaragara yaba nk'inzu ndangamateka, ku buryo hajya haza abantu baje kuhasura kagasiga bishyuye. Ikindi ni uko badukorera umuhanda mwiza uhagera, ku buryo abaza kuhasura bahagera ku buryo bworoshye.”

Mugenzi we witwa Mukamana yagize ati: "Nyine bazatuzanire umuhanda, na hariya ku Ivubiro bahubake, abazungu bajye baza kuhasura badusigire amafaranga."

Umuyobozi w'Akarere ka Gakenke, Mukandayisenga Vestine

Ku bijyanye n'ibyifuzo by'aba baturage, Umuyobozi w'Akarere ka Gakenke, Mukandayisenga Vestine, yavuze ko hari gahunda yo gutunganya neza aho hari Ivubiro ry'i Huro, ndetse bagakora umuhanda uhanyura ukagera i Ruli.

Yagize ati: "Nk'uko mwabibonye, hariya hari Ivubiro ariko ngira ngo mukurikije n'ubutaka ririho ni buto, n'ahantu twateye ibyapa ni mu murima w'umuturage. Rero turi muri gahunda y'uko tuzabarira uriya muturage ku buryo twakwagura cyangwa tukamugurira ubutaka nk'Akarere, tuzamuha ingurane ikwiye, hanyuma tukazahashyira uruzitiro. Turafatanya kandi n'abafatanyabikorwa ku buryo tuzahubaka inzu ntoya ishobora kujyamo ariya mateka, nk'uko mwagiye mubibona, abasaza ni bakuru, ejo n'ejobundi bazaba batagihari, ariko dushobora gushyiramo n'amashusho yabo (video) barimo gusobanura ayo mateka."

Yakomeje agira ati: "Ikigendanye rero n'umuhanda nacyo mwari mukomojeho, nk'uko mwabibonye n'ubundi kuva ku Kirenge kugera hano, no mu muhanda munini ntabwo umeze neza, harimo n'ibiraro bitameze neza, ariko muri gahunda nini ni uko hazashyirwamo kaburimbo."

Intebe y'Inteko yungirije mu Nteko y'Umuco, Uwiringiyimana Jean Claude

Intebe y'Inteko yungirije mu Nteko y'Umuco, Bwana Uwiringiyimana Jean Claude, yagaragaje ko ahantu nyaburanga hose hari indangamurage z'umuco nyarwanda hagomba gushyirwa ibimenyetso ndetse n'ibikorwa remezo bifasha abahaturiye kugira ibikorwa by'ubukerarugendo bishobora kubabyarira inyungu, ibi bikaba bigendeye ku biteganywa n'amategeko y'u Rwanda.

Yagize ati: "Nk'uko mubizi rero, ahantu ndangamurage ni ibice bifite agaciro gakomeye cyane ku bijyanye n'amateka y'igihugu ndetse n'umuco, bikaba rero ari ngombwa kuhabungabunga by'umwihariko […] kubungabunga ahantu ndangamurage ni uko ari umutungo ukomeye w'igihugu, ni umutungo dukwiriye guhererekanya ibisekuru ku bisekuru […] gushyiraho ibyapa rero ni byiza kugira ngo murinde aho hantu, abantu babagane. Ni ku bufatanye, twe by'umwihariko nk'Inteko y'Umuco twiyemeje ko aho hantu hari ku rutonde, twakora ku buryo dufatanyije n'uturere twahashyira ibyo byapa."

I Huro hari umurwa w'ab anyamihango b'Umuganura bitwaga Abiru bo kwa Myaka, bakaba ari nabo bategekaga uyu musozi. Hahurizwaga imyaka ikoherezwa ibwami qukoreshwa mu muhango w'Umuganura. Iyo ni yo mvano y'imvugo yogeye mu Rwanda igira iti: "Ihuriro ni i Huro".

Kimwe mu bimenyetso by'amateka bikigaragara i Huro ni ivubiro ryahashyizwe n'umuvubyi witwaga Minyaruko ya Nyamikenke wari umwami wu Busigi mu kinyejana kinyejana cya 16, abisabwe n'Umwami Ruganzu II Ndori.

Iri vubiro ryifashishwaga n'Abiru b'abahinzi bo kwa Myaka bakarikoresha bapima imvura, bashaka kumenya niba izagwira igihe cyangwa izatinda. lyo bamenyaga ko izatinda bihutiraga kuyivubisha kugira ngo badatinda kubiba imbuto zizera imyaka yo gukoresha mu muhango w'Umuganura.

Inteko y'Umuco ivuga ko mu gihugu hose hari ahantu ndangamurage hagera kuri 530, bikaba bigaragaza uko hakenewe imbaraga nyinshi mu kuhabungabunga no kuhabyaza umusaruro binyuze mu bukerarugendo bushingiye ku muco.

Ivubiro rya Huro

Umuganura 2025: Abanyarwanda barasabwa kuwizihiza bategurira hamwe ibikorwa by'ejo hazaza

Mahame — 2025-07-31T08:10:22Z

Umuganura wa 2025 uzizihirizwa ku rwego rw'Igihugu mu Karere ka Musanze mu Ntara y'Amajyaruguru, tariki ya 1 Kanama 2025, mu gihe n'abandi bose bazawizihiza ku rwego rw'Intara, Akarere, Umudugudu, Umuryango, mu mahanga no mu rwego rw'abikorera.
Insanganyamatsiko y'uyu mwaka iragira iti: "Umuganura, isoko y'ubumwe n'ishingiro ryo kwigira."

Iyi nsanganyamatsiko ishimangira ko kwizihiza Umuganura atari ukurambika ibyo umuntu yagezeho gusa, ahubwo ari igihe cyo kwiyemeza kuzakora ibirenzeho no gutegura ahazaza hashyize hamwe.

Amateka agaragaza ko Umuganura wari umwe mu mihango y'ingenzi y'ubwiru ku ngoma ya cyami, ugakorerwa Umwami cyangwa Umugabekazi mu rwego rwo gushimira Imana umusaruro w'ubuhinzi n'imigisha y'igihugu.

Wabaye inkingi ikomeye mu kubaka ubumwe no gusigasira umuco. Gusa mu 1925 abakoroni barawuhagaritse, bawufata nk'igikoresho cy'ubutegetsi n'ukwemera kwa Kinyarwanda.

Nyuma y'imyaka irenga 80, Leta y'Ubumwe yemeje kugarura Umuganura mu 2011, ugirwa umunsi w'ikirenga wo kwishimira ibyiza igihugu kigezeho, ariko cyane cyane ukaba n'umwanya wo kureba imbere, tuganira ku ntego zifatika zigamije iterambere rirambye.

Ni muri urwo rwego Abanyarwanda basabwa kuzawizihiza ku buryo bwagutse, haba mu ngo, mu midugudu, mu mashuri, mu bigo byigenga, n'ahandi hose hahurira abantu.
Kwizihiza Umuganura 2025 bigomba kuba n'umwanya wo kuganira ku byo twifuza kugeraho nk'igihugu: guhanga imirimo, guteza imbere ubuhinzi, guharanira uburezi bufite ireme, kurwanya igwingira n'ubukene, no gukomeza guharanira ubumwe n'agaciro k'Abanyarwanda.

Uretse Musanze yahiswemo kwakira ibirori ku rwego rw'Igihugu kuko kuva Umuganura wasubizwaho iteka nta birori birahabera, izindi Ntara nazo zizahitamo Akarere kazakira ibirori, mu gihe ku rwego rw'Akarere na ho abatuye bazahurira hamwe bagasabana, baganire ku nsanganyamatsiko y'uyu mwaka.

No ku rwego rw'umuryango, buri rugo rurakangurirwa gufata umwanya wo gusangira ibyishimo, gusubiza amaso ku byo bagezeho no kwiyemeza ibikorwa bigamije iterambere mu mwaka utaha.

Abanyarwanda baba mu mahanga bazawizihiza mu bihugu batuyemo, batoranya umunsi ubabereye mu kwezi kwa Kanama.

Mu bikorera, nabo basabwa kwizihiza Umuganura mu bigo byabo, bishimira uruhare bagira mu guteza imbere ubukungu bw'igihugu, banaganira ku mahirwe n'inzira zo gukomeza kugira uruhare mu iterambere ry'Abanyarwanda.

Kwizihiza Umuganura 2025 si ibirori gusa; ni igikorwa cy'ubumwe, cyo kureba aho tugeze no gukorera hamwe ejo hazaza. Ni umwanya wo kuvuga tuti "Twakoze neza, ariko dufite byinshi dukwiye kongera gukora neza kurushaho."

Inkomoko y'Insigamugani “Umusindi yarenze akarwa”

2019-11-11T10:10:23Z

Wakomotse kuri Ruganzu I Bwimba wategetse u Rwanda, ubwo ahasaga mu wa 1345 yiteguraga gutera mu Gisaka nk'uko tubikesha igitabo “Intwari z'Imbanza, zubatse u Rwanda rugahamya igitinyiro”, cyanditswe na Nsanzabera Jean de Dieu.

Mu iyima rya Bwimba, yasanze ibihugu by'ibituranyi by'u Rwanda byose bifite akayihayiho ko kurutera, bitewe n'ishyari byari birufitiye nk'igihugu cyahanzwe nyuma yabyo ariko kikabirusha umuvuduko w'iterambere, gahunda ihamye yo kucyubaka no kwita ku mibereho y'abaturage.

Ruganzu Bwimba yabibonye kare, atangira gutekereza uburyo bwangushye bwo kubatanga akaba ari we ubatera.

Byahoraga birekereje ngo birebe aho ubushotoranyi bwaturuka, ubundi rukambikana. Muri icyo kibariro u Bugesera bwaje kumvikana n'u Rwanda, bagirana imimaro ariyo masezerano yo gudaterana, i Gisaka cyo kirabyanga gishaka kwigarurira u Rwanda rw'Abanyiginya.

Icyo gihe Kimenyi I Musaya umwami w'i Gisaka yize ubucakura bwo kurongora mushiki wa Ruganzu witwaga Nyiramateke Robwa, mu rwego rwo kwiyenza ku Rwanda.

Uwo mugambi akaba yarawutangiye ku ngoma ya Nsoro Samukondo se wa Bwimba ariko baramumwima, na mbere y'uko atanga yihanangiriza Bwimba wamuzunguye ku ngoma ko atazashyingira umwami w'i Gisaka.

Mu iyima rya Bwimba, Kimenyi Musaya yasubukuye umugambi we wari warapfubye wo gushaka mu Banyiginya. Umwami Ruganzu Bwimba n'abajyanama be barabirwanyije cyane, ariko Umugabekazi Nyakanga na mubyara we Nkurukumbi barabyemeza, ngo ibyiza ni uko banywana n'i Gisaka kugira ngo kitazabatera kuko cyabarushaga amaboko, naho ibyo kugitera babitera utwatsi.

Bwimba yaje kumvikana na mushiki we Nyiramateke Robwa kutazabyarana n'umwami w'i Gisaka umwana w'umuhungu, kugira ngo atazatera u Rwanda, ndetse biza kugera aho yemeza ko nasama inda ye aziyahura.

Igihe cyarageze Nyiramateke Robwa ashyingirwa mu Gisaka, asama inda ya Kimenyi umwami wa Gisaka cy'Abagesera b'Abazirankende, ariko ntiyabihisha musaza we. Ni uko Bwimba na we yihutira gushaka umutabazi w'Umucengeri uzapfa mbere ya Nyiramateke Robwa, indagu zerera Nkurukumbi, mubyara w'Umugabekazi Nyakanga.

Kubera ubwoba, Nkurukumbi yarabyanze ahubwo yituga amatugunguru mu kibuno avuga ko arwaye (ngo yazanye amagara), adashobora gutabarira igihugu kuko afite imiziro.

Ariko Bwimba ntiyanyurwa n'ubwo bucakura, nuko aramubwira ati “Niba ufite imiziro, nibyo byiza maze ukagenda ukanduza inka zabo nazo zikarwara indwara urwaye. Ko batadukunda se!'' Nkurukumbi aranga ararahira, avuga ko atazamenera u Rwanda amaraso.

Indagu za kabiri zafashe Umwami Bwimba we ubwe. Muri icyo gihe, mbere yo gutabara, yasize abwiye nyina ati “Imyaka agahumbi Abasinga mudasubira ku ngoma” kuko yabonaga nyina wakomokaga mu Basinga ariwe ugambaniye u Rwanda agashyingira i Gisaka, akanabuza n'umuhungu we Bwimba kugitera, amaze no koshya Nkurukumbi kwanga inshingano z'ubutabazi ngo u Rwanda rutsinde.

Mu kwanga ko Bwimba ajya gutabara, nyina yashyizwe umweko mu bikingi by'amarembo agira ngo amubuze gutabara, undi aranga arawusimbuka aravuga ati “Umusindi yarenze akarwa, nimusigarane amagara yanyu ayanjye nyajyanye mu Gisaka”.

Ruganzu Bwimba ntabwo yatewe ubwoba n'abo mu muryango we batemeranyaga na we ibyo gutera i Gisaka kuko gahunda yo kwagura igihugu no kugihuza hakoreshejwe uruhembe rw'umuheto yari ayisangije wenyine, ahamanya n'umutimanama we ko agomba gukabya inzozi za Sekuruza Gihanga.

Bwimba ararubira ashoza urugamba, ingabo z'i Gisaka zimutsinda i Nkungu na Munyaga (Rutonde muri Kibungo) ubu ni mu Karere ka Rwamagana.

Mushiki wa Ruganzu I Bwimba amaze kumva ko Musaza we yatanze, Nyiramateke Robwa yisekuye ku nkota arapfa, kugira ngo umwana atwite atazavamo umwami w'i Gisaka akazatera u Rwanda rwa Gihanga.

Uwo Ruganzu I Bwimba na mushiki we Nyiramateke Robwa babarirwa mu batabazi b'abacengeri b'ikubitiro bitangiye Ingoma y'i Gasabo. Amaraso ya Bwimba yari amaze kumenekera mu Gisaka yashushanyaga intsinzi y'iteka ryose u Rwanda rwagomba guhorana mu mugambi wo kwagura igihugu.

View online : article 0