Imirasire.rw

Icyizere cy'ibiganiro bya Amerika na Iran cyatumye ibiciro bya peteroli ku isoko akagunguru kagera munsi ya 72$

Mahame — 2026-07-01T15:41:11Z

Imibare yo ku wa 1 Nyakanga 2026 igaragaza ko igiciro cya peteroli kidatunganyije (crude oil) cyagabanyutseho hafi 0,95$, kikava ku rwego rwo hejuru kigera kuri 72$.

Uku kugabanuka kwatewe ahanini n'ibiganiro byabereye i Doha muri Qatar, aho Perezida wa Leta Zunze Ubumwe za Amerika, Donald Trump, yavuze ko ibiganiro byagenze neza kandi ko hari intambwe igaragara mu kumvikana hagati y'impande zombi.

Ibi biganiro byibanze ku buryo ubwikorezi bwa peteroli bukorerwa mu Nzira ya Hormuz bwakomeza kugenda neza, kuko ari imwe mu nzira zikomeye zinyuzwamo peteroli iva mu Burasirazuba bwo Hagati igana ku masoko mpuzamahanga.

Icyizere cy'uko nta bibazo bikomeye byakoma mu nkokora icuruzwa rya peteroli cyatumye isoko rigabanuka, abashoramari bagabanya ubwoba bari bafite ku ihungabana ry'ibiciro.

Abasesenguzi kandi bavuga ko ibihugu bigize ihuriro rya OPEC+ bishobora kongera ingano ya peteroli bitunganya, ibintu bishobora gutuma ibiciro bikomeza kumanuka ku isoko mpuzamahanga.

Nubwo bimeze bityo, hari impungenge zikomeje kuba mu isoko zituruka ku bibazo by'umutekano mu Burasirazuba bwo Hagati, aho ubushyamirane bushobora gutuma ibiciro byongera kuzamuka mu buryo butunguranye.

Kugeza ubu, abasesenguzi bateganya ko ibiciro bya peteroli bishobora gukomeza kuguma hagati ya 72$ na 75$ ku kagunguru, bitewe n'uko ibiganiro bya dipolomasi bizagenda n'uko OPEC+ izafata ibyemezo ku musaruro wayo.

IMF yemereye u Rwanda inguzanyo ya miliyari 365 Frw yo guhangana n'ingaruka z'ibibazo by'ubukungu

Mahame — 2026-06-09T12:45:09Z

Icyemezo cyafashwe ku wa 8 Kamena 2026, aho Inama y'Ubutegetsi ya IMF yemeje ko iyi nguzanyo izatangwa mu byiciro mu gihe cy'amezi 38. Gusa byemejwe ko icyiciro cya mbere cya miliyoni 35,7 z'Amadolari (miliyari 52,2 Frw) kizahita gitangwa kugira ngo u Rwanda rubashe guhangana n'ibibazo byihutirwa by'ubukungu.

IMF yatangaje ko iyi nguzanyo iri mu cyiciro cy'inguzanyo zoroherejwe ibihugu biri mu nzira y'iterambere, kuko ifite inyungu nkeya kandi u Rwanda ntiruhita rutangira kuyishyura ako kanya.

Iyi gahunda ishima kandi ishimangira ko ubukungu bw'u Rwanda bukomeje kugaragaza imbaraga, aho mu 2025 bwazamutse ku gipimo cya 9,4%, bitewe ahanini n'amafaranga ava mu bicuruzwa byoherezwa mu mahanga birimo ikawa, icyayi n'amabuye y'agaciro nka zahabu, coltan na gasegereti.

Umuyobozi w'agateganyo w'inama y'ubuyobozi ya IMF, Bo Li, yashimye uburyo ubukungu bw'u Rwanda bwakomeje kwihagararaho nubwo hari ibibazo bitandukanye byagiye bivuka, avuga ko bigaragaza ubushake bwo gukora amavugurura no gushyiraho politiki ihamye.

IMF igaragaza ko hakenewe kongerwa imbaraga mu guhangana n'izamuka ry'ibiciro no kongera umusaruro w'ibikorerwa imbere mu gihugu, kuko ibitumizwa mu mahanga bikiri byinshi, cyane cyane ku bigo by'ubucuruzi.

Raporo ya IMF kandi igaragaza ko intambara iri kubera mu Burasirazuba bwo Hagati ishobora kugabanya umuvuduko w'izamuka ry'ubukungu bw'u Rwanda, aho ishobora kugabanuka ikagera munsi ya 6,8% mu 2026, ivuye kuri 9,4% yo mu 2025.

Iyi ntambara ihanganishije Iran, United States na Israel yamaze kugira ingaruka ku isoko mpuzamahanga zirimo izamuka rikabije ry'ibiciro bya peteroli n'ifumbire.

Bimwe mu byagaragaye harimo gufungwa k'Umuhora wa Hormuz unyuramo hafi 20% bya peteroli itwarwa ku isoko mpuzamahanga, bituma ubwikorezi buhagarara ndetse ibiciro bya lisansi na mazutu birazamuka cyane.

Mu Rwanda, ibiciro bya lisansi byageze kuri 2.938 Frw kuri litiro, mu gihe mazutu igeze kuri 2.927 Frw, bituma n'ibiciro byo gutwara abantu mu buryo bwa rusange byiyongera, nubwo Leta yashyizeho nkunganire kugira ngo abaturage batabihomberamo cyane.

Ku wa 6 Kamena, Minisitiri w'Intebe, Dr. Nsengiyumva Justin, yasobanuye ko iyo Leta itashyiraho nkunganire ya 18,26%, igiciro cya mazutu cyari kugera kuri 3.581 Frw kuri litiro aho kuba 2.927 Frw.

IMF ivuga ko iyi nguzanyo izafasha u Rwanda kongera ubushobozi bwo kwinjiza amadovize, kugabanya igitutu ku nguzanyo z'igihugu, gucunga izamuka ry'ibiciro no gushyigikira abikorera mu rwego rwo kongera umusaruro.

Kwizera ko Leta Zunze Ubumwe za Amerika na Iran byakumvikana byagabanije igiciro cya peteroli ho 6%

Mahame — 2026-05-25T09:03:03Z

Amakuru dukesha Reuters agaragaza ko igiciro cy'akagunguru ka peteroli cyagabanyutseho 5,85$ bingana na 5,7%, kigera kuri 97,69$.

Igiciro cy'akagungura ka peteroli icukurwa muri Texas izwi nka ‘U.S. West Texas Intermediate' cyo cyagabanyutseho 6%, kigera kuri 90,85$.

Iki nicyo giciro gito kibayeho cy'ibikomoka kuri peteroli kuva ku wa 7 Gicurasi 2026.

Kumanuka kw'ibi biciro kwabayeho nyuma y'uko Perezida wa Leta Zunze Ubumwe za Amerika, Donald Trump atangaje ko ibyinshi byamaze kumvikanwaho hagati y'igihugu cye na Iran hagamijwe kurangiza intambara no gufungura umuhora wa Hormuz.

Nubwo bimeze gutyo, hari izindi ngingo Amerika ivuga ko itarumvikanaho na Iran, ndetse ku Cyumweru Trump yavuze ko ntacyihutisha igihugu cye mu bijyanye no kugirana amasezerano na Iran.

Kugeza ubu Leta Zunze Ubumwe za Amerika na Iran biri gukora ku masezerano ashobora kurangiza intambara burundu. Nta ruhande ruratangaza ibiyakubiyemo, gusa zombi zivuga ko ageze kure.

CNN yatangaje ko zimwe mu ngingo z'ingenzi zishobora kuba ziri muri aya masezerano harimo ijyanye no gufungura umuhora wa Hormuz, ariko Iran ikifuza ko izakomeza kugenzura ibikorwa byawo.

Iran kandi ishaka ko Amerika ihagarika ibikorwa byo gufunga ibyambu byayo. Ku rundi ruhande, Amerika yifuza ko Iran ihagarika umugambi wo gukora intwaro za nucléaire.

Ikindi Iran isaba ni uko imitungo yayo irimo n'amafaranga yafatiriwe na banki mpuzamahanga irekurwa.

Kugeza ubu imirwano ihanganishije impande zombi isa n'iyacogoye nyuma y'aho Trump afashe icyemezo cyo kudasubukura ibitero nubwo igihe cy'agahenge kari kashyizweho cyarangiye.

Rwanda: Ibiciro ku isoko byiyongereyeho 13% muri Mata 2026

Mahame — 2026-05-13T07:40:26Z

Iyi raporo ya Consumer Price Index (CPI) yasohotse ku wa 10 Gicurasi 2026.

Ku rwego rw'ukwezi ku kundi (month-on-month), ibiciro byiyongereyeho 5.9% hagati ya Werurwe na Mata 2026, nyuma y'uko muri Werurwe byari byazamutseho 1.7% gusa.

Imwe mu nzego zagaragayemo izamuka rikomeye ni iy'imiturire, amazi, amashanyarazi na gaz, aho ibiciro byazamutse ku kigero cya 21.3% ku mwaka ndetse bikiyongeraho 5.9% ku kwezi.

Ibiciro by'ibinyobwa bisembuye n'itabi byazamutse ku kigero cya 17.1% ku mwaka n'0.4% ku kwezi, mu gihe ibiribwa n'ibinyobwa bidasembuye byiyongereyeho 5.8% ku mwaka ndetse na 4.3% ku kwezi.

Ubwikorezi bwazamutse ku kigero cya 23.7% ku mwaka na 15.1% ku kwezi, mu gihe urwego rw'ubuzima rwazamutse ku kigero cya 70% ku mwaka na 0.3% ku kwezi.

Amaresitora na hoteli na byo byazamutseho 18.5% ku mwaka na 0.1% ku kwezi.

Consumer Price Index (CPI) ni igipimo gikoreshwa mu gupima ihindagurika ry'ibiciro ku masoko, kikaba gifasha gusobanukirwa uko ubukungu buhagaze n'ingaruka ku mibereho y'abaturage.

Izamuka rya 13% ku mwaka rikomeje kugaragaza ko ibiciro, cyane cyane ku bintu by'ibanze nk'ingufu, ubwikorezi n'ibiribwa, bikomeje kugira ingaruka ku mibereho y'abaturage.

Abasesenguzi bagaragaza ko iri zamuka rishobora gukomeza guterwa n'izamuka ry'ibiciro by'ibikomoka kuri peteroli, ihindagurika ry'ibihe ku musaruro w'ubuhinzi, ndetse n'ihindagurika ry'isoko mpuzamahanga.

Kudatanga amasoko ku gihe bikomeje kudindiza ishyirwa mu bikorwa ry'ingengo y'imari ya Leta mu Rwanda

Ukulikiyinkindi Didace — 2026-05-07T08:11:42Z

Ingengo y'imari ya Leta ni yo shingiro ry'ishyirwa mu bikorwa rya gahunda za Leta buri mwaka, by'umwihariko izigamije guteza imbere imibereho myiza y'abaturage mu nzego zirimo uburezi, ubuzima, ubuhinzi n'ibikorwa remezo.

Icyakora, iyo amasoko atinze gutangwa, ibikorwa byose byateganyijwe biradindira, bikagira ingaruka ku baturage bagombaga kubyungukiramo.

Iki kibazo cyagarutsweho mu mahugurwa y'abanyamakuru yabaye kuva tariki ya 5 kugeza ku ya 7 Gicurasi 2026, yateguwe ku nkunga ya Fojo Media Institute.

Aya mahugurwa yari agamije kongerera abanyamakuru ubumenyi ku ngengo y'imari ya Leta, uburyo itegurwa, uko ishyirwa mu bikorwa ndetse n'uko bayikurikirana mu nyungu z'abaturage.

Mu biganiro byatanzwe, hagaragajwe ko gutinda gutanga amasoko bituma igihe cyo gutangira imishinga gisubikwa, kuko kuva isoko ritangarijwe kugeza hasinywe amasezerano n'uwatsinze bishobora gufata igihe kirekire.

Ibi bituma ibikorwa byinshi bidindira cyangwa bikarangira bikorwa mu buryo bwihuse budatanga umusaruro wifuzwa.

Urugero rugaragara cyane ni urw'imishinga y'ibikorwa remezo nko kubaka imihanda, aho hari aho amasoko amara amezi menshi ataratangwa cyangwa atararangizwa.

Ibi bituma abaturage bakomeza kubura imihanda myiza, bigahungabanya ubwikorezi n'ubucuruzi, cyane cyane mu bihe by'imvura aho ubuhinzi bugira ingorane zo kugeza umusaruro ku masoko.

No mu rwego rw'uburezi, gutinda gutanga amasoko bituma kubaka ibyumba by'amashuri cyangwa kugura ibikoresho by'ishuri bidindira, bigatuma abanyeshuri bakomeza kwigira mu byumba bicucitse cyangwa badafite ibikoresho bihagije, bityo ireme ry'uburezi rikagabanuka.

Mu rwego rw'ubuzima na ho ni uko bimeze, aho kubaka ibitaro cyangwa kubigezaho ibikoresho by'ibanze bitinda, bigatuma abaturage batabona serivisi z'ubuvuzi ku gihe cyangwa bakazishakira kure, bikabateza igihombo n'ingorane.

Impamvu z'iki kibazo zirimo imikorere idahwitse mu nzego zishinzwe amasoko, kubura ubushobozi buhagije bw'abakozi, kutubahiriza amategeko agenga amasoko ya Leta, ndetse n'inzitizi zijyanye n'imyanzuro ifata igihe kirekire.

Aya mahugurwa yanagarutse ku ruhare rw'itangazamakuru mu gukurikirana ingengo y'imari ya Leta, hibandwa ku byiciro byayo birimo itegurwa, iyemezwa, ishyirwa mu bikorwa n'isuzumabikorwa. Abanyamakuru basabwe gukurikirana buri cyiciro no kugeza amakuru ku baturage kugira ngo barusheho gusobanukirwa uko umutungo wa Leta ukoreshwa.

Abanyamakuru bayitabiriye bagaragaje ko yungutse ubumenyi buzabafasha gukora inkuru zifite ireme ku ngengo y'imari ya Leta. Umwe mu banyamakuru ba Radio Authentique yavuze ko yungutse uburyo bwo gushaka amakuru, kuyasesengura no kuyatangaza mu buryo bwa kinyamwuga.

Mu rwego rwo gukemura ikibazo cy'amasoko adatangwa ku gihe, hasabwe ko inzego zibishinzwe zinoza imikorere, zikubahiriza igihe ntarengwa cyagenwe n'amategeko, kandi hagakazwa ikoreshwa ry'ikoranabuhanga mu gutanga no gukurikirana amasoko. Byongeye kandi, hakenewe gukaza igenzura kugira ngo ibibazo bikosorwe hakiri kare.

Uruhare rw'itangazamakuru rukomeje kugaragazwa nk'ingenzi mu gukurikirana no kugaragaza aho imishinga igeze, gukebura abashinzwe kuyishyira mu bikorwa no gutuma habaho gukorera ku gihe, bityo ingengo y'imari ya Leta ikagera ku ntego zayo zo guteza imbere imibereho y'abaturage.

Abanyamakuru bari guhabwa ubumenyi ku bijyanye n'ingengo y'imari ya Leta

Rumwe mu nganda zikora udukingirizo rwatangaje ko rugiye kuzmura ibiciro byatwo ho 30%

Mahame — 2026-04-22T19:34:26Z

Iyi sosiyete ikora udukingirizo turenga miliyari eshanu ku mwaka, yatangaje ko ihura n'ibibazo bikomeye mu kubona ibikoresho by'ibanze bikenerwa mu gukora udukingirizo, cyane cyane ibikomoka ku binyabutabire bya ‘ammonia'.

Umuyobozi Mukuru wa Karex, Goh Miah Kiat, yavuze ko ihungabana ry'ubucuruzi mpuzamahanga ryatewe n'iyi ntambara ryatumye ibiciro by'ibikoresho byiyongera cyane, bituma batagishobora gukomeza kugurisha ku biciro bisanzwe.

Ibi bibazo byaturutse ahanini ku guhagarara cyangwa kugabanuka kw'ingendo z'ubwato bunini bw'ubucuruzi bunyura mu nzira yo mu Nkomane ya Hormuz, inzira ifite uruhare runini mu bucuruzi bw'isi, cyane cyane mu gutwara ibikomoka kuri peteroli n'ibindi bikoresho by'inganda.

Uku guhungabana kw'ubucuruzi kwagize ingaruka zikomeye ku biciro bya peteroli ku rwego mpuzamahanga, bituma n'ibiciro byo gutwara ibicuruzwa bizamuka, ari na byo byatumye ibigo byinshi birimo Karex byiyemeza kuzamura ibiciro by'ibyo bikora.

Inzobere mu by'ubukungu zigaragaza ko izamuka ry'ibiciro by'udukingirizo rishobora kugira ingaruka ku buzima rusange, cyane cyane muri gahunda z'ubuzima zigamije kurinda indwara zandurira mu mibonano mpuzabitsina no kuringaniza imbyaro, kuko ushobora gusanga abaturage batabasha kubigura uko bisanzwe.

Mu gihe iyi ntambara igikomeje guteza ihungabana ku rwego mpuzamahanga, biteganyijwe ko ibiciro by'ibicuruzwa byinshi by'ibanze bishobora gukomeza kuzamuka, bigakomeza gushyira igitutu ku baturage n'inzego zitandukanye z'ubukungu ku Isi.

Hagiye gutangwa miliyari 3.9 z'amadolari zizafasha ibihugu biri mu nzira y'amajyambere kubungabunga ibidukikije

Mahame — 2026-04-10T12:19:27Z

Aya mafaranga azifashishwa cyane cyane mu gufasha ibihugu bikiri mu nzira y'amajyambere guhangana n'ibibazo bikomeye byangiza ibidukikije, no guteza imbere iterambere rirengera kamere, rifitiye akamaro abaturage ndetse n'urusobe rw'ibinyabuzima.

Iyi gahunda nshya izwi nka GEF-9 izatangira muri Nyakanga 2026 ikageza muri Kamena 2030.

Biteganyijwe ko hazongerwaho andi mafaranga mu nama y'Inama Nkuru ya GEF izaba mu mpera za Gicurasi, mbere y'uko hemezwa burundu ingengo y'imari yose izakoreshwa muri iyi gahunda.

Umuyobozi w'agateganyo wa GEF, Claude Gascon, yavuze ko aya mafaranga agaragaza ko isi igifite ubushake bwo kurengera ibidukikije nubwo hari izindi mbogamizi z'ingenzi ziri kwitabwaho.

Yagize ati: “Iyi nkunga itanga ubutumwa bukomeye ko isi idateze gucika intege ku bijyanye no kurengera kamere. Ibihugu byatanze inkunga byagaragaje ubushake bwo gushyigikira ejo hazaza heza h'isi.”

GEF ikora nk'urwego rufasha mu gutera inkunga amasezerano mpuzamahanga arimo ayo kubungabunga urusobe rw'ibinyabuzima (Convention on Biological Diversity), ay'umuryango w'abibumye arebana na gahunda zo guhangana n'imihindagurikire y'ikirere (United Nations Framework Convention on Climate Change) , ay'umuryango w'abibumye arebana no guhangana n'ibibazo bituma habahi ubutayu (UN Convention to Combat Desertification) n'andi agamije guhangana n'imihindagurikire y'ikirere, iyangirika ry'ibidukikije n'ibindi bibazo byugarije isi.

Ubudage bwagaragaje ko bushyigikiye iyi gahunda, aho Niels Annen yavuze ko ubufatanye mpuzamahanga bukenewe kurusha ikindi gihe cyose mu kurengera isi.

Yagize ati: “Dukeneye gufatanya kurengera isi ku bw'inyungu z'ibisekuru bizaza. Iterambere rirambye rigomba kujyana no kurengera ibidukikije.”

Iyi nkunga ije mu gihe raporo zitandukanye zigaragaza ko urusobe rw'binyabuzima n'ibidukikije biri kugenda byangirika ku muvuduko mwinshi, ku buryo isi iri kwegera ahantu hashobora guteza ingaruka zikomeye.

Mu myaka ine iri imbere, GEF izibanda ku bintu bine by'ingenzi birimo:

Gushyira hamwe gahunda zitandukanye mu nzego nk'ubuhinzi, ingufu, ubuzima n'imijyi, hagamijwe kugabanya ibikorwa byangiza ibidukikije;

Gushishikariza ishoramari ry'abikorera kugira ngo ryunganire inkunga za Leta;

Guteza imbere ubufatanye burimo inzego za Leta, sosiyete sivile, urubyiruko n'abagore;

Kongera inkunga ihabwa ibihugu bikennye n'ibirwa bito, ndetse n'abaturage kavukire.

Richard Bontjer, umwe mu bayobozi b'Inama Nkuru ya GEF, yavuze ko iyi nkunga ari icyizere gikomeye ku bushobozi bw'iki kigega mu gutanga umusaruro ugaragara.

Ati: “Mu gihe buri dorari rigomba gukoreshwa neza, GEF igaragaza ko ikwiye gushorwamo imari kuko itanga ibisubizo bifatika.”

Inama ya 71 ya GEF izabera mu mujyi wa Samarkand kuva ku ya 31 Gicurasi kugeza ku ya 3 Kamena 2026, mbere y'Inteko Rusange ya munani y'iki kigega, aho ibihugu bizatangaza ku mugaragaro ingano y'inkunga byiyemeje gutanga.

Iyi gahunda itegerejweho gufasha isi kugera ku ntego zo kubungabunga ibidukikije mu mwaka wa 2030, binyuze mu bufatanye bw'ibihugu byo mu Majyaruguru n'ibyo mu Majyepfo y'isi.

U Rwanda rwahawe akayabo k'amadolari n'ikigega cy'imari ku isi IFM kubera COVID-19

2020-04-03T07:07:41Z

Aya mafaranga yatanzwe mu rwego rw'inguzanyo zihuse (Rapid Credit facility), zihabwa ibihugu biri mu nzira y'amajyambere igihe bifite impamvu zihutirwa zikeneye gushyirwamo amafaranga, zikishyurwa by'igihe kirekire kandi zihendutse.

IMF ivuga ko ingaruka z'icyorezo cya COVID-19 mu bukungu ziri kugaragara, bikaba bizabangamira imigambi y'iterambere ryihuse ibihugu byari byarihaye (Ibyerecyezo). Gusa abayobozi bihutiye gushyiraho ingamba zo gufasha kwirinda no kugabanya ikwirakwizwa ry'iki cyorezo.

Byitezwe ko aya mafaranga azunganira ingufu z'ubuyobozi mu guhagarika igabanuka ry'ubwizigame mu mafaranga y'amahanga akenerwa, no kunganira ingengo y'imari mu kongera amafaranga ashyirwa mu bikorwa byo gukumira icyorezo no kugabanya ingaruka cyagira ku bukungu. Aya mafaranga kandi byitezwe ko asembura izindi nkunga z'amahanga, cyane cyane mu buryo bw'impano.

Nyuma y'ibiganiro byemerejwemo ayo mafaranga, Umuyobozi wungirije w'Inama y'Ubuyobozi ya IMF, Tao Zhang, yavuze ko icyorezo cya COVID-19 cyahungabanyije ubukungu bw'u Rwanda, ku buryo byari kugira ingaruka ku mafaranga igihugu cyinjiza n'ayo gikeneye gukoresha.

Ubwo Coronavirus yatahurwaga mu Rwanda, hafashwe ingamba zo kuyikumira zirimo gufunga imipaka, ingendo n'ibikorwa byinshi by'ubucuruzi, ku buryo ingaruka za Coronavirus zageze ku bikorwa byose bibyara inyungu. Bitewe n'ibibazo bijyana n'iki cyorezo no kuba nta wamenya igihe kizarangirira, ingaruka zishobora gukomeza kwiyongera.

Zhang yakomeje ati "Inkunga ya IMF binyuze mu nguzanyo zihutirwa izafasha mu kugabanya igitutu COVID-19 ikomeje gushyira ku bucuruzi, ubukerarugendo n'ububiko bw'amafaranga y'amahanga akenerwa mu ivunjisha, kandi izatanga ubushobozi bukenewe cyane mu rwego rw'ubuzima, ku ngo n'ibigo byagizweho ingaruka n'ibi bibazo. Ikwiye kandi kuba nk'intangiriro y'abaterankunga."

IMF inatanga inama ko mu mikoreshereze y'imari, amafaranga aba akwiye kwifashishwa mu bintu byihutirwa, ariko ntihanibagirane izindi nzego z'ingenzi mu buzima bw'abaturage.

Aya mafaranga yemejwe mu gihe umubare w'abamaze kwandura Coronavirus mu Rwanda wageze ku bantu 82.

Ku rwego mpuzamahanga, abamaze kwandura Coronavirus bamaze kurenga miliyoni imwe, abamaze gupfa ni ibihumbi 53 naho abamaze gukira ni ibihumbi 212.